Ռուսաստանն ու Թուրքիան Ղրիմի վերաբերյալ հակադարձ հայտարարություններ են արել

Անկարայի դիրքորոշումը Ղրիմի թերակղզու ապօրինի զավթման վերաբերյալ չի փոխվել: Թուրքիան ճանաչում է Ուկրաինայի ինքնիշխանությունը և տարածքային ամբողջականությունը: Ինչպես հաղորդում է tert.am-ը այդ մասին ասվում է Թուրքիայի արտաքին գերատեսչության հայտարարության տեքստում, որն այսօր հրապարակվել է Ղրիմի բռնակցման տասնամյակի կապակցությամբ:
Թուրքիայի արտաքին գործերի նախարարությունը հիշեցրել է, որ 10 տարի առաջ՝ 2014 թվականի մարտի 16-ին, տեղի է ունեցել ապօրինի հանրաքվե, որով Ռուսաստանի Դաշնության կողմից զավթվել է Ուկրաինայի Ղրիմի Ինքնավար Հանրապետությունը: «Մենք կշարունակենք ուշադիր հետևել Ղրիմում տեղի ունեցող զարգացումներին և դրա կարևոր հանգամանքներից մեկին՝ Ղրիմի թաթար թուրքերի իրավիճակին, որը մեր օրակարգում առաջնահերթություն է», - ասվում է ԱԳՆ հայտարարության մեջ։ Անկարան վերահաստատում է, որ չի ճանաչում այսօր առկա իրավիճակը, որը հանդիսանում է միջազգային իրավունքի խախտում, և իր աջակցությունն է հայտնում Ուկրաինայի տարածքային ամբողջականությանն ու ինքնիշխանությանը։

Միաժամանակ, Ռուսաստանի ԱԳ նախարարը հայտարարել է, որ Ղրիմը և Սևաստոպոլը Ռուսաստանի անբաժանելի մաս են, դրանց պատկանելության հարցն ընդմիշտ փակված է։ Նա այդ մասին հայտարարել է «Ղրիմի գարնան» 10-րդ տարեդարձին նվիրված տեսաուղերձում: 
«Ղրիմի և Սևաստոպոլի սեփականության հարցը փակված է, թերակղզին Ռուսաստանի Դաշնության անբաժանելի մասն է»,- ասել է Սերգեյ Լավրովը։ Նրա խոսքով` Ղրիմը հետագա զարգացման հստակ հեռանկար ունի, Ռուսաստանը լուծել է Ուկրաինայից ժառանգած բազմաթիվ խնդիրներ, ընդգծել է նախարարը։
«Վերջին տարիներին մեզ հաջողվել է հաղթահարել Ուկրաինայից ժառանգած մեծ թվով խնդիրներ: Հետագա զարգացման հստակ հեռանկարով՝ ղրիմցիները կարող են վստահորեն և լավատեսորեն նայել ապագային»,- ասել է Լավրովը:
Նրա խոսքով՝ «տասը տարի առաջ՝ 2014 թվականի մարտի 16-ին, Ղրիմի բնակիչները հանրաքվեով ինքնուրույն, գիտակցաբար որոշեցին իրենց ապագան՝ վերամիավորվելով Ռուսաստանի հետ»: