Պատերազմող երկրում մեզ ասում են՝ ռազմահայրենասիրություն բառը մի օգտագործեք. Կարին Տոնոյան
Այս նախարարությունը «Ռազմագիտություն» առարկան դպրոցից հանեց. պատկերացնո՞ւմ եք, պատերազմող երկրում, որտեղ ամեն օր զոհվում է մեկ պատանի, հանում են «Ռազմագիտություն» առարկան, կամ արգելում են ռազմահայրենասիրություն բառն օգտագործել: Այս մասին ԵՊՀ ուսանողների բողոքի ակցիայի ընթացքում Tert.am-ի հետ զրույցում ասաց «Հայ ասպետ» հիմնադրամի հիմնադիր տնօրեն Կարին Տոնոյանը:
«Նիստերի ժամանակ մեզ ասում են՝ ռազմահայերանասիրություն բառը մի օգտագործեք: Մենք պահանջում էինք «Ռազմագիտության» դասագիրքը լավացնել, դուք ընդհանրապես հանում եք: Հանում են ու ասում, թե ճամբարներ պետք է կազմակերպեն: Դուք գոնե գիտե՞ք, թե դա ինչ բարդ գործ է, գիտե՞ք դա ինչպես է արվելու, ի՞նչ բազայով, ի՞նչ գումարով, ուսուցիչներ պետք է լինեն, ղեկավարներ պետք է լինեն:
էդ ինչպե՞ս եք կազմակերպելու, ե՞րբ քննարկեցինք, ե՞րբ խոսեցիք այդ մասին, ե՞րբ հայեցակարգ մշակեցիք, ուղղակի օդում շպրտել, որ ճամբարներ կկազմակերպեք...»,- ասաց նա:
Կարին Տոնոյանը վստահություն հայտնեց, որ ճամբարներ էլ չեն կարողանալու կազմակերպել և գործընթացը կտապալվի: Ըստ նրա՝ վերջում ստացվելու է այնպես, որ դպրոցում «Ռազմագիտություն» առարկան չկա, ճամբար էլ չի լինի, չի ստացվի:
«Մեր երեխաները, եթե մինչև հիմա որոշ գիտելիք ստացած էին գնում բանակ, հիմա ընդհանարապես ոչինչ չիմանալով, կգնան: Ինձ ամենաշատն այստեղ զայրացնում է թեթևամիտ վերաբերմունքը «Ռազմագիտություն» առարկայի նկատմամբ, որովհետև դա այնքան լուրջ խնդիր է, որ պետք էր դրսից բերել լրջագույն մասնագետների և մտածել՝ ինչպես մեր դպրոցներում ու բուհերում խորացնել այդ առարկան, որ բանակ գնացող զինվորը «էշ նահատակ» չդառնա»,- ասաց նա:
Ըստ Տոնոյանի՝ որտեղ խնդիր են տեսնում, որոշում են փակել, խնդիրը լուծելու փոխարեն. «Է փակեք, պետությունն էլ փակեք»,- նշեց նա:
Մանրամասները՝ տեսանյութում:
Հետևեք մեզ Facebook-ում