Ինչո՞ւ են այս տարի Հրապարակի տոնածառը շուտ ապամոնտաժում

Անցած տարիներին Երևանի ամանորյա զարդարանանք ու լուսավորությունը, Հանրապետության գլխավոր տոնածառը մնում էին մինչև հին տոմարով Նոր տարին՝ հունվարի 14-ը։ Մարդիկ ժամանակ էին ունենում մարզերից գալ, տեսնել ամանորյա Երևանը, լուսանկարվել զարդարանքի ֆոնին։ Այս տարին Երևանի քաղաքապետարանը որոշել է շուտ ապամոնտաժել տոնածառը, անջատել տոնական լուսավորությունը, ինչն առաջացրել է քաղաքացիների զարմանաքը։

Panorama.am-ը դիմեց քաղաքապետարան՝ հասկանալու, թե ինչո՞ւ են այս տարի շուտ ապամոնտաժում Հանրապետության գլխավոր տոնածառը, ինչին ի պատասխան Երևանի քաղաքապետի մամուլի քարտուղար Հայկ Կոստանյանն ասաց.

«Քանի որ տոնածառի լույսերի վառման արարողությունը, քաղաքի ամանորյա լուսավորությունը նախորդ տարի դեկտեմբերի 8-ից է մեկնարկել, դրանով պայմանավորված այս տարի ավելի վաղ են տոնածառը հավաքում, ինչպես նաև ամանորյա լուսավորումը։ Փաստացի 1 ամիս թե տոնածառի լույսերը, թե քաղաքի ամանորյա լուսավորությունը միացված է եղել»։

Հիշեցնենք, որ, օրինակ, 2023-ին Հանրապետության գլխավոր տոնածառի լույսերը վառվել էին դեկտեմբերի 19-ին։