Kommersant. Անօդաչու թռչող սարքերի հետ կապված հայ-իսրայելական սկանդալը նոր ընթացք է ստանում

Իսրայելի պաշտպանության նախարարությունը հետաքննություն է անցկացնում Aeronautics Defense Systems (ADS) ընկերության դեմ, որն արտադրում է հարվածային անօդաչու սարքեր։ Ինչպես ավելի վաղ հայտել էր իսրայելական «Մաարիվ» թերթը, Թել Ավիվում տեղակայված ընկերության աշխատակիցները կարող էին ադրբեջանցի զինվորականների խնդրանքով մասնակցել ԼՂ-ում հայկական դիրքերին ուղղված հարվածին։ Ընկերությունը բոլոր մեղադրանքները վճռականորեն հերքում է, չնայած Բաքվի հետ նրա համագործակցության մասին հայտնի է վաղուց։ Պարբերականը հայտնել էր Aeronautics Defense Systems (ADS)-ի ներկայացուցիչների պատվիրակության՝ վերջերս Ադրբեջան կայացած այցի մասին։ Նպատակը եղել է Orbiter 1K կամիկաձե անօդաչուների մատակարարման պայմանագրի կնքումը։ Դրանք կարող են կրել 2 կգ մարտական լիցք, որը կակտիվանա թիրախին բախվելիս և կարող է ոչնչացնել, օրինակ, ավտոմեքենա։ Թեմային անդրադարձ է անում Kommersant-ը։

Ինչպես հաստատել էր հոդվածի հեղինակ Յոսի Մելմանը, ադրբեջանցի զինվորականները խնդրել էին իսրայելցի ինժեներներին ցույց տալ տեխնիկան գործնականում՝ հարված հասցնելով ԼՂ-ում դիրքերին։ Տեսանկարահանումն այնուհետև իբրև թե պատրաստվել են ցուցադրել Ադրբեջանի հեռուստատեսությամբ՝ «ի ցույց դնելու ազգային հպարտությունն ու ռազմական հզորությունը»։

Սակայն երկու իսրայելցի օպերատորներ կտրականապես հրաժարվել են ուղղել դրոնները ԼՂ-ի ուղղությամբ, չնայած ADS-ի ղեկավարության պատվիրակությունը համաձայնել էր ադրբեջանական կողմի պայմաններին։ Իսրայելական ընկերության մենեջերները մեղադրել էին օպերատորներին նրանում, որ նրանց պատճառով կարող է կարևոր գործարք խափանվել, սակայն նրանք չեն ենթակվել։ Այդ ժամանակ երկու անօդաչուները կառավարել են մենեջերներն անձամբ։ Պարբերականի հաղորդմամբ՝ դրանից հետո օպերատորներից մեկը հեռացել է ընկերություներից, երկրորդը պատրաստվում է նույնն անել։

Հայկական ԶԼՄ-ները, հղում անելով իրենց աղբյուրներին, հստակեցրել են միջադեպի ամսաթիվը՝ հուլիսի 7: Ադրբեջանի ՊՆ-ն սկանդալի առնչությամբ պաշտոնական հայտարարություն չի արել, չի պատասխանել նաև Kommersant-ի հարցմանը:

Իսրայելի ՊՆ մամլո ծառայությունն իր հերթին նշել է, որ գերատեսչությունը սովորաբար չի մեկնաբանում ռազմական արտահանման հետ կապված տեղեկությունները։ Այդ հարցը գտնվում է ՊՆ համապատասխան բաժանմունքների կողմից ստուգման փուլում։ Գերատեսչությունում նշել են, որ եթե Aeronautics Defense Systems-ի ինժեներները գնացել են Ադրբեջան, ապա նրանց հետ իսրայելցի զինվորականներ չեն եղել։

Մանրամասնետը՝ Kommersant.ru-ում: