Հայաստանն ու Ադրբեջանը մոտ են պատերազմին. Միջազգային ճգնաժամային խումբ

«Միջազգային ճգնաժամային խումբը» զեկույց է հրապարակել նվիրված ղարաբաղյան հակամարտությանը: Զեկույցում մասնավորապես նշվում է, որ Հայաստանն ու Ադրբեջանը Ղարաբաղում ավելի մոտ են պատերազմին, քան երբևէ վերջին 20 տարում՝ հրադադարի հաստատումից հետո։

Վերլուծաբանները նշում են, որ ապրիլյան ռազմական բախումների պատճառ դարձած քաղաքական իրավիճակը և անվտանգության հարցերը ավելի բարդացան, և կողմերը հայտնում են լարվածության աճի նոր ալիքի մասին: «2017 թ. կեսերին հաճախակիացել են մահվան դեպքերը ծանր հրետանանային և հակատանկային զենքերի կիրառման հետևանքով: Մայիսին իրավիճակը շփման գծում բավականին լարված էր, հաղորդվում էր ինքնակառավարվող հրթիռների կիրառման մասին հակամարտ զորքերի շփման գծում, խիտ բնակեցված շրջանների մոտ: կարգավորման գործընթացը կանգ է առել, երկու կողմերն էլ պատրաստ են տրվել ուժի կիրառման գայթակղությանը, ելնելով տակտիկական նկատառումներից: Այդ լարվածությունը կարող է վերաճել լայնամասշտաբ պատերազմի, ինչը զգալի թվով զոհերի կհանգեցնի քաղաքացիական բնակչության շրջանում և, հնարավոր է, հիմնական տարածաշրջանային խաղացողներին ստիպի խառնվել իրավիճակին: Ռուսաստանը, ԱՄՆ-ն ու Ֆրանսիան պետք է մի կողմ դնեն առկա տարաձայնությունները, կողմերի վրա ճնշում գործադրեն՝ լարվածությունը թուլացնելու և նոր բռնության բռնկման ռիսկերը նվազեցնելու նպատակով», - ասվում է «Միջազգային ճգնաժամային խմբի» զեկույցում:

Միևնույն ժամանակ վերլուծաբանները նշում են, որ Ադրբեջանի ու Հայաստանի նախագահների հանդիպումը Վիեննայում և Սանկտ Պետերբուրգում, կազմակերպված ապրիլյան պատերազմից հետո, որը 200 մարդու կյանք խլեց, սպասելի արդյունքներ չտվեցին: «Միջազգային ճգնաժամային խումբ»-ը նշում է, որ առաջնորդները հրաժարվեցին վերսկսել բանակցությունները, նախապատվությունը տալով առաջնագիծ այցելելուն և ռազմական հռետորիկայով հանդես գալուն:

«Անցյալ տարին ցույց տվեց հակամարտության կարգավորման ջանքերի փխրունությունը: Հայաստանը, մտահոգվելով Լեռնային Ղարաբաղի անվտանգությամբ և վրդովված Բաքվի աճող ինքնավստահությամբ, պնդում է նվազեցնել անվտանգության սպառնալիքների մակարդակը նախքան բովանդակային երկխոսություն սկսելը: Ադրբեջանը, վրդովված լինելով ստատուս քվոյի երկարաձգմամբ և մտավախություն ունենալով, որ լրացուցիչ անվտանգության միջոցառումները կարող են ամրապնդել այն, պնդում է, որ բովանդակային երկխոսությունները չեն կարող հետաձգվել», - ասվում է զեկույցում:

Վերլուծաբանները նշում են, որ կարգավորումը զիջումներ է ենթադրում, բայց կողմերը պատրաստ չեն դրան: Ըստ այդմ, բանակցությունները հայտնվել են փակուղային վիճակում:

Zham.am