Մենք կանգնած ենք մեծագույն վտանգի առաջ, այն է՝ պետականության կորուստը. Գևորգ Գևորգյան. Տեսանյութ
29 տարվա ընթացքում մեր ձեռքբերումը մեր անկախությունն էր, բանակն ու պետականությունը: Բանակը մեր պետականության միակ երաշխավորն է և մենք դեռ շատ անելիք ունենք, որպեսզի մեր անկախ պետությունը կանգնուն մնա: Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Ազգային ճակատ» ՀԿ հիմնադիր Գևորգ Գևորգյան՝ շնորհավորելով «Անկախության օրվա» կապակցությամբ:
Հաղորդման մյուս հյուրի՝ սփյուռքահայ ազատամարտիկ Շահե Աճեմյանի դիտարկմամբ՝ անցնող 29 տարվա մեջ կարողացել ենք ունենալ մեծագույն ձեռքբերում՝ Արցախը:
Հարցին՝ մենք դեռ 90-ականներին տեսանք տարանջատում՝ արցախցիներ ու հայաստանցիներ,իսկ վերջին երկու տարում՝ սևեր ու սպիտակներ, Շահե Աճեմյանը պատասխանել է. «Զարգացած ու խելացի մարդը գիտի, որ Հայաստանում սևեր ու սպիտակներ չկան, կա հայ: Հրապարակում մնացել է ցածր խավը, բայց մենք այնպես պետք է անենք, որ խելացիները հրապարակ գան»:
Գևորգ Գևորգյանի խոսքով՝ բաժանարար գծեր դնելով՝ գործող իշխանությունը վտանգում է մեր անվտանգությունը. «Փաշինյանն ու իր վարչախումբը երկու տարի է՝ իրականացնում են հստակ քայլեր: Դեռ երկու տարի առաջ Փաշինյանն սկսեց չարությամբ քայլել, որը վտանգավոր հետևանքներ է թողել ու թողնում»:
Ռազմական գործչի համոզմամբ՝ մենք կանգնած ենք մեծագույն վտանգի առաջ, այն է՝ պետականության կորուստը:
Շահե Աճեմյանը կիսում է Գևորգ Գևորգյանի կարծիքը. «Երկիրը վտանգված է, ու Փաշինյանին իշխանության բերողները փոքրամասնություն էին, սակայն կարողացան հրապարակը լցնել: Տարիներով ժողովրդի մեջ ատելություն սերմանելով՝ Փաշինյանը հասավ իր նպատակներին»:
Շահե Աճեմյանի դիտարկմամբ՝ հաղթեց ոչ թե Նիկոլ Փաշինյանը, այլ այն թույնը, որով տարիներ շարունակ կերակրել են ժողովրդին:
Անդրադառնալով «Անկախության տոնին» նվիրված Նիկոլ Փաշինյանի շնորհավորանքին՝ որտեղ Փաշինյանը ոչ մի լավ բան չի տեսնում անցնող 29 տարում, բացի 2018-ի հեղափոխությունը, Շահե Աճեմյանն ասել է. «Փառք Աստծո, որ ես դեբիլ չեմ, որ հավատամ Նիկոլ Փաշինյանի խոսքին: Դա վարչապետի՞ խոսք է, դա շնորհավորանքի՞ խոսք է: Հերիք եղավ, էս մարդը որտեղի՞ց եկավ մեր գլխին»:
Գևորգ Գևորգյանն էլ իր հերթին ավելացրել է. «Աբսուրդը նրանում է, որ Հայաստանից ու պետականությունից խոսում են մարդիկ, որոնք ոչ մի կապ չունեն մեր երկրի պետականության կայացման հետ»: