Պետք է տեղյակ լինեինք, բայց ՀՀ-ից մոտ 500 անձ հետախուզվում է Ինտերպոլի կողմից, բոլորին չենք կարող հիշել. Արա Ֆիդանյանը՝ Գևորգ Կոստանյանի նկատմամբ հետախուզումը դադարեցնելուց տեղյակ չլինելու մասին

Մենք ստանում ենք գործեր, ստանում ենք հետախուզում հայտարարելու վերաբերյալ որոշումներ, և այնտեղ մեղադրանքները բազմաթիվ են, չեմ կարող հիմա կոնկրետ ասել, թե Քրեական օրենսգրքի որ հոդվածով է եղել Գևորգ Կոստանյանի նկատմամբ հետապնդումը: Այս մասին այսօր ԱԺ-ում լրագրողների հետ զրույցում ասաց ՀՀ փոխոստիկանապետ Արա Ֆիդանյանը՝ խոսելով հրապարակված այն փաստաթղթի մասին, ըստ որի՝ Ինտերպոլը հրաժարվել է ՀՀ նախկին գլխավոր դատախազ Գևորգ Կոստանյանի նկատմամբ հետախուզում հայտարարելուց։

Հիշեցնենք, որ ԱԺ անկախ պատգամավոր Թագուհի Թովմասյանը հայտարարել էր, որ Ինտերպոլը համարում է, որ ՀՀ գլխավոր դատախազությունն ու Հատուկ քննչական ծառայությունն անհիմն քաղաքական գործ են սարքել, ու այդ գործով իրենք չեն կարող որևէ մեկի տեղաշարժը սահմանափակել կամ որևէ մեկի նկատմամբ հետախուզում հայտարարել։ Եվ ըստ այդ փաստաթղթի՝ նաև նշվում է, որ «Մարտի 1»-ի գործը քաղաքական է ու պետք չէ Ինտերպոլին խառնել դրան:

Ֆիդանյանը նշեց, որ այս պահին չի կարող մանրամասներ ներկայացնել, քանի որ փաստաթուղթը նոր է հրապարակվել: Հարցին, թե արդյո՞ք Ոստիկանությունը մերժում ստացել է կամ տվյալներ չկա՞ն, թե արդյոք դադարեցվել են գործակցություններն այդ մասով, փոխոստիկանապետը պատասխանեց, որ բավական մեծ թվով անձանց վերաբերյալ փաստաթղթեր են ստանում պարբերաբար: «Կոնկրետ, թե ում անձի վերաբերյալ ենք ստացել և ումով է դադարեցվել, չեմ կարող մտաբերել: Չեմ հիշում ումն է հրապարակվել, ումը՝ ոչ»:

Դիտարկմանը՝ եթե  ՀՔԾ-ին և Դատախազությանը տրամադրվել է, ապա Ոստիկանությունը ևս պետք է տեղյակ լինի այդ մասին, Ֆիդանյանն արձագանքեց. «Միանշանակ պետք է տեղյակ լինեինք, բայց, անձանց թիվը հաշվի առնելով, որը բավական մեծ է, եթե չեմ սխալվում, Հայաստանից մոտ 500 անձ հետախուզվում է Ինտերպոլի կողմից, հետևաբար բոլորին չենք կարող հիշել»,-ասաց նաև լրագրողի ճշտող հարցին, թե արդյոք շատ են նույն հիմնավորմամբ պատասխանները, քանի որ, ըստ հայտարարության,  հետախուզումը քաղաքական է, և Ինտերպոլը խառնվել չի կարող, վերջինս պատասխանեց, որ եթե ժամանակ տան և գրավոր հարցն ուղղեն, կպարզի, թե որ դեպքի մասին է խոսքը:

«Երբ հայցադիմումն ուղարկվում է, մենք չենք ուսումնասիրում մեղադրանքները, մենք ուսումնասիրում ենք փաստաթղթերի ամբողջականությունը, դրա համապատասխանելիությունը Ինտերպոլի փաստաթղթերի տրամադրման կանոններին: Եթե մեղադրանքն այնտեղ կա, եթե հետախուզում հայտարարելու վերաբերյալ որոշումը կա, և այդ ամբողջ փաստաթղթերը համապատասխանում են, հետևաբար մենք ներկայացնում ենք այն»,-ասաց նա:

Մանրամասները՝ Tert.am-ի տեսանյութում։