Սյունիքի Տեղ գյուղում, Արավուսում, Քարաշենում, Խնածախում ոռոգման ջրի լուրջ խնդիրներ կան, ոռոգման համակարգ չկա. Ներսես Շադունց
Տեղ համայնքում խոտհարքը շարունակվում է, մեկնարկել է նաև բերքահավաքը։ Կոռնիձորում, Արավուսում, Քարաշենում, Խնածախում եւս արդեն սկսվել են ակտիվ գյուղատնտեսական աշխատանքները։
Հունիսի 27-ին, երբ Տեղ գյուղի բնակիչները Անդրուն քարեր դաշտամասում հավաքելիս էին եղել հնձած խոտը, թշնամու զինվորները իջել էին դիրքերից և արգելել խոտհավաքը, դրանից հետո նոր միջադեպեր չեն գրանցվել։
«Միջադեպը հարթվել է։ Գյուղացիներից ահազանգ չի եղել։ Կրակոցներ չկան։ Մանր-մունր բաներ են՝ իրենք այնտեղից կգոռգոռան, կխոսան, թե ինչ կանեն, մենք էլ մեր հերթին կանենք։ Փորձում ենք այնպես անել, որ բերքը հավաքեն»,-«Փաստինֆո»-ին հայտնեց Տեղ համայնքի ղեկավար Ներսես Շադունցը՝ նշելով, որ խոսքը չի կարող գնալ այն տարածքների մասին, որոնք հայտնվել են սահմանագծից այն կողմ։
Վերջին միջադեպից հետո բնակիչներն առավել ուշադիր են, լավ գիտեն, որ այլևս միայնակ դաշտերում աշխատել չեն կարող։
«Ժողովուրդը համակերպվել է, որ մենակով դաշտ չեն գնում, խմբով են գնում, բացի դրանից սահմանապահ տղաները կանգնած են։ Ճիշտ է, սահմանապահ կետերը իրարից մի քիչ հեռու են, բայց միջսահմանային կետերի տարածքում ժողովուրդը գնում են խմբով, իրենց գործը անում»։
Տեղ համայնքի մի շարք գյուղերում ևս առկա է ոռոգման ջրի լուրջ խնդիր։
«Կոնկրետ Տեղ գյուղում, Արավուսում, Քարաշենում, Խնածախում ոռոգման լուրջ խնդիրներ ունենք, որովհետև ոռոգման համակարգ չկա։ Դրա համար խմելու ջրի հաշվին փորձում ենք լուծել ու խմելու ջրի հետ կապված խնդիրներ էլ են առաջանում։ Իսկ հիմա մենք կոնկրետ Խնածախի և Խոզնավարի հետ կապված սուբվենցիոն ծրագիր ենք ներկայացրել երկու գյուղի ոռոգման հարցերը կարգավորելու, ոռոգման ջուրը բնակիչներին ավելի մոտեցնելու համար, կտեսնեք ինչ կստացվի»։
Համայնքում հույս ունեն հաստատված սուբվենցիոն ծրագրի միջոցով ոռոգման ջրի հետ կապված հարցը լուծել։ Պատերազմից հետո Սյունիքի մարզում միջգերատեսչական հանձնաժողով է ստեղծվել՝ կարգավորելու անվտանգային, նաև որոշակի սոցիալական հարցեր։ Տեղ համայնքը հանձնաժողովի միջոցով ստացել է բեռնատար նոր մեքենա, քանի որ նախկինը պատերազմի ժամանակ կորցրել էին մարտական խնդիր լուծելիս։ Հիմա նաև փոքր մոտոբլոկներ են բերվել, որոնք առաջիկայում կբաժանվեն ըստ բնակավայրերի։
«Երկար ժամանակ է ծրագիր էինք քննարկում Խնածախում խմելու ջրի ջրագծի հարցը լուծելու համար՝ հինգերորդ տարին է զբաղվում էինք։ Ծրագիրը հաստատվել է, շինարարը հայտնի է, մեկ շաբաթից կսկսվեն շինարարական աշխատանքները։ Ներքին ջրագծի հարցն էլ կլուծվի, որը վաղուց էր հաստատված, սակայն նախագծի հետ կապված հարցեր էին առաջացել»։
Համայնքում հիմա բազմաթիվ ծրագրեր իրականացման, մեծ մասը նաև հաստատման փուլում են, որոշներն էլ՝ քննարկման։
Շադունցը, խոսելով Սյունիքում գրեթե երկու ամիս տեղակայված ադրբեջանցիների քանակի մասին, հայտնեց, որ թշնամու զորքի թիվը հստակ չի կարող ասել, բայց վարչական տարածքի սահմանագծին ադրբեջանցիների տեղակայման մասով փոփոխություններ չկա։
«Միգուցե թիկունքում ունեն, չեմ կարող ասել, սակայն լուրջ փոփոխություններ չեմ նկատել»։
Այս պահին երկուստեք ինժեներական աշխատանքները դադարեցված են, համայնքի ղեկավարի կարծիքով՝ պայմանավորվածություն կա։
Հետևեք մեզ Facebook-ում