Զրպարտության համար պետք է ամեն ինչ սուտ լինի, իսկ Նարեկ Մալյանը փաստական տվյալների հիման վրա կատարել է եզրակացություն․ պաշտպանը՝ Սաքունցի հայցի մասին. Տեսանյութ
Դատական նիստին հայցը ներկայացվեց, մենք մեր դիրքորոշումը ներկայացրինք և նիստը հետաձգվեց։ Այս մասին Tert.am-ի հետ զրույցում ասաց «ՎԵՏՕ» շարժման ղեկավար Նարեկ Մալյանի պաշտպան Տիգրան Աթանեսյանը՝ ներկայացնելով Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի՝ ընդդեմ Նարեկ Մալյանի հայցի քննության առաջին դատական նիստը։
«Արթուր Սաքունցն իր հարցազրույցներից մեկում միտք է արտահայտել, կամ քարոզ է իրականացրել, որ իր բառերով ասված՝ գրավյալ տարածքները պետք է աստիճանաբար հանձնել Ադրբեջանին, որպեսզի Սաքունցի համախոհները Ադրբեջանում ունենան լավ ֆունդամենտ։ Սորոսի հիմնադրամը հերթական անգամ գումար է հատկացրել՝ 221 հազար դոլար Սաքունցի կազմակերպությանը և դրամաշնորհային ծրագրի նպատակներից մեկն է՝ խաղաղության կերտումը։ Բնականաբար եթե մարդ ունի նման հայացքներ խաղաղության վերաբերյալ Նարեկ Մալյանը կատարել է եզրահանգում, որ Սաքունցը ստացել է այդքան գումար՝ հողերը հանձնելու քարոզչության համար»,-ասաց նա։
Տիգրան Աթանեսյանը նշեց, որ Արթուր Սաքունցը մեկ միլիոն դրամ է պահանջում զրպարտության համար, այնինչ Նարեկ Մալյանը մեջբերել է Սաքունցի խոսքերը։ «Մենք ունենք ապացույց, որը տեղադրված է հիմնադրամի կայքում, որ Սաքունից կազմակերպությունը այդքան գումար է ստացել ինչ-որ անհասկանալի խաղաղության կերտման համար։ Զրպարտության համար պետք է ամեն ինչ սուտ լինի, իսկ մենք վերցրել ենք փաստական տվյալներ և դրանց հիման վրա կատարել եզրակացություն, ինչը ամբողջությամբ տեղավորվում է խոսքի ազատության իրավունքի մեջ»,-ասաց նա։
Պաշտպանը նշեց, որ նման հայցադիմումը պետք է մերժվի, քանի որ ակնհայտ ապօրինի է, և Սաքունցը դատի է տվել՝ զուտ դատի է տված լինելու համար։