Երբ նա ԱԺ-ում խոսեց, որ սահմանները չպաշտպանելը պետական դավաճանություն է, ինքնախոստովանական ցուցմունք տվեց. Շարմազանով. Տեսանյութ
Մեր կուսակցությունը շուրջ 3.5 տարի պայքարի կիզակետում է, մեր օրակարգում կա մեկ գլխավոր հարց, դա այս կապիտուլյանտ ռեժիմի հեռացումն է եւ մենք պատրաստ ենք համագորմծակցելու բոլոր պետականամետ, ազգային ուժերի հետ: Այս մասին այսօր` նոյեմբերի 22-ին, Երեւանի առաջին ատյանի դատարանի Ավանի եւ Նոր Նորքի նստավայրի մոտ լրագրողների հետ զրույցում ասաց ՀՀԿ մամուլի խոսնակ Էդուարդ Շարմազանովը` պատասխանելով, թե կմիանան օրերս սկիզբ առած շարժմանը, որը պահանջում է Փաշինյանից հրապարակել ինչ փաստաթուղթ է ստորագրում:
Լրագրողի այն հարցին, թե ինչ նկատի ուներ Փաշինյանը, երբ ասում է, որ չկա արցախյան հարցի հայանպաստ լուծում, այլ ուղղակի կա լուծում, կամ չկա լուծում, Շարմազանովը հակադարձեց, որ եթե չկար հայանպաստ լուծում, ապա ինչու այդքան զոհեր տվեցինք պատերազմում:
«Սա խոսում է մի բանի մասին, որ յուրաքանչյուր պետության ղեկավար պետք է սպասարկի իր պետության շահը: Եթե նա ԱԺ-ում հանդգնաբար հայտարարում է, որ խնդրին պետք է լուծում, է լուծումը կարող է լինել Ադրբեջանի կազմում, կամ Արցախի հայաթափումը, Սյունիքի հայաթափումը: Սա հերթական դավադիր, դավաճանական հայտարարությունն է, որը նա անում է: Իսկ երբ նա ԱԺ-ում խոսեց, որ սահմանները չպաշտպանելը դա պետական դավաճանություն է, նա ինքնախոստովանական ցուցմունք տվեց, որովհետեւ Սոթք-Խոզնավար հատվածում եւ Սեւ լճի տարածքում, նա ասում էր` հո Սեւ լճի 30 տոկոսի համար կռիվ չենք սկսելու: Ավելին` 2020 թվականի դեկտեմբերի 17-18-ին, ինքը էլի ԱԺ-ում ինքնախոստովանական ցուցմունք է տվել, որ իրականացնելով քայլ, որը ներառված չէ նոյեմբերի 9-ի հայտարարության մեջ, նա հայկական զինուժը մի քանի կմ հետ է տվել եւ թուրքին բերել կանգնեցրել է Սյունիքի բարձունքներին»,-ասաց նա: