Մեդվեդևը կրկին սպառնացել է Արևմուտքին միջուկային պատերազմով, եթե Ռուսաստանը հայտնվի ծանր վիճակի մեջ

Իր վերջին հոդվածում, տպագրված ռուսական «Իզվեստիա» թերթում, ՌԴ նախկին նախագահ և ներկայիս ՌԴ Անվտանգության խորհրդի նախագահի տեղակալ Դմիտրի Մեդվեդևը կրկին սպառնացել է Արևմուտքին միջուկային պատերազմով, նշելով բառացի հետևյալը. «...եթե լրջորեն ծագի բուն Ռուսաստանի գոյության հարցը, դա ամենևին էլ չի որոշվի ուկրաինական ճակատում, այլ կլուծվի ամբողջ մարդկային քաղաքակրթության հետագա գոյության հարցի հետ միասին, քանի որ մեզ Աշխարհ առանց Ռուսաստանի պետք չէ...»:

«...Ուկրաինայում այժմ ծավալվող ողբերգության սկիզբը դրվեց այն պահին, երբ փլուզվեց Խորհրդային Միությունը:

Կայսրության ծաղկման շրջանից հետո՝ երկար ճանապարհ դեպի նույն եզրափակիչը՝ կազմալուծում և պատերազմ: Սա համաշխարհային օրենք է, պատմության անկասելի ընթացքը։ Եվ այդպես եղավ ԽՍՀՄ-ի հետ՝ միայն ուշացած տարբերակով։ Պատերազմը կարող էր ավելի վաղ լինել, բայց հիմա է այն բորբոքվել։ Մեր դեպքում կատալիզատոր դարձավ արևմտյան աշխարհի սրիկայական և ցինիկ դիրքորոշումը...»,- գրում է Մեդվեդևը իր հոդվածում:

Նրա կարծիքով, երկու ժամկետ կարելի է համարել անվերադարձ. առաջինը 2008 թվականի աշունն է, երբ արեւմտյան աշխարհը աջակցեց Վրաստանի ագրեսիային օս ժողովրդի դեմ։ Երկրորդը՝ 2014 թվականի գարունն էր, երբ Ղրիմի ժողովուրդը հանրաքվեյով արտահայտեց իր կամքը՝ վերադառնալով պատմական հայրենիք:

«...Արևմուտքում դա առաջացրեց կատաղի հիստերիա և ցանկություն ստեղծելու նորաստեղծ Ֆրանկենշտեյն՝ ի դեմս Ուկրաինայի՝ հատուկ «հակառուսական...»,-շարունակում է նա:

«...Ցանկացած փլուզված կայսրություն իր փլատակների տակ է թաղում աշխարհի կեսը: Նրանք, ովքեր ավերեցին ԽՍՀՄ-ը, իսկ հիմա փորձում են կործանել Ռուսաստանը, չեն ուզում դա ըմբռնել՝ հազարավոր մարդկանց կյանքեր գցելով վառարանը։ Ինչպես ԽՍՀՄ-ի դեպքում, դա չի աշխատի։ Եթե լրջորեն դրվի Ռուսաստանի գոյության հարցը, ապա դա չի որոշվի ուկրաինական ճակատում...»,- եզրափակում է իր միտքը Մեդվեդևը:

Վերջում, սակայն նա համոզմունք է հայտնում, որ դա տեղի չի ունենա, և Ռուսաստանը չի պարտվի:

«...Կիևի ռեժիմին զենքով աջակցելը և բանակցությունների խոչընդոտելը հանգեցնում է բոլորի համար լիակատար կորստի, Ապոկալիպսիսի, Ռուսաստանը դա թույլ չի տա...»,- ավարտում է իր հոդվածը Մեդվեդևը:

Որոշ ռուս և արևմտյան փորձագետների կարծիքով, Մեդվեդևի գրառումներին պետք է լուրջ վերաբերվել, քանզի նա այսօր կատարում է այն դերը, ինչը ժամանակին իրականացնում էր Վլադիմիր Ժիրինովսկին:

Սակայն Ժիրինովսկին, ֆորմալ իշխանությանը չէր ներկայացնում, մինչդեռ Մեդվեդևն այսօր Ռուսաստանի անվտանգության խորհդի նախագահի տեղակալի պաշտոնն է զբաղեցում: Հիշեցնենք, որ այսօր այդ կառույցի ղեկավարի պաշտոնում Վլադիմիր Պուտինն է, այսինքն այդ երկրի նախագահը: Այսինքն, Մեդվեդևը փաստացի ներկայացնում է այն կարծիքը, որը հրապարակային մակարդակով դեռ չի արտահայտում Պուտինը: Իսկ դա նշանակում է, որ Կրեմլը այդ քայլով նախազգուշացնում է Վաշինգտոնին իր կարմիր գծերի մասին, որից այն կողմ գործընթացը կարող է անդառնալի բնույթ կրել բոլորի, այդ թվում նաև ԱՄՆ-ի համար:

Սա է իրականությունը: 

Արտակ Հակոբյան