«Ապօրինի գույքի բռնագանձման մասին» օրենքի կիրառման ընթացքում կարող են բազում խնդիրներ առաջանալ. չզարմանաք, որ կիրառումից կարճ ժամանակ հետո ինչ-որ փոփոխություններ ինքս նախաձեռնեմ. Գլխավոր դատախազ
ԱԺ պետական-իրավական հարցերի մշտական հանձնաժողովի նիստի ընթացքում հանձնաժողովի անդամ, «Լուսավոր Հայաստան» խմբակցության պատգամավոր Տարոն Սիմոնյանը, դիմելով Գլխավոր դատախազ Արթուր Դավթյանին, նշեց՝ ԱԺ-ն ընդունել է «Ապօրինի գույքի բռնագանձման մասին» օրենքի նախագիծ, որն ուղղակիորեն ավելացնելու է Դատախազության գործերի քանակը: Հաղորդում է Tert.am-ը:
«Այն ռեսուրսներով, որոնք Դատախազությունն ունի, միգուցե նաև չկարողանա ճիշտ արձագանքել այդ գործերի քանակին ու սխալների քանակն ավելանա»,-նկատեց պատգամավորը՝ հարցնելով՝ Դատախազությունն ինչպե՞ս է պատրաստվում այդ հարցը լուծել:
Դավթյանն արձագանքեց՝ այն բացարձակ նոր գործիքակազմ է, և Դատախազությունը տեսականորեն, որոշակի առումով նաև գործնականորեն պատկերացնում է իր անելիքները: «Բայց ես համաձայն եմ, որ, այո, դրա կոնկրետ կիրառման ընթացքում կարող են բազում խնդիրներ առաջանալ: Օրենքը նոր է ընդունվել, և երբ սկսի գործադրվել, և շատ կարճ ժամանակ հետո նաև ես նախաձեռնեմ, որ դրա մեջ ինչ-որ մի բան փոխվի, չզարմանաք: Հիմա եմ ասում, որ պետք է դրան պատրաստ լինել, որովհետև առաջին անգամ պետք է այդ գործիքը կիրառենք, իսկ գործիքի կիրառումը բերելու է հատկապես դրանից պաշտպանվողների մտքի ճկունության: Այդ մտքի ճկունության և մեր` արդեն իսկ սահմանած կարգավորումներն ինչպես իրար հետ կմրցակցեն, ձեզ դիմելու առիթ կարող է էլի առաջանալ»,-ասաց նա՝ նշելով նաև, թե այս պահին համարում է, որ իրենք իրենց անելիքը գիտեն:
Հիշեցնենք, որ Ազգային ժողովն ապրիլի 16-ին երկրորդ ընթերցմամբ և ամբողջությամբ ընդունել էր «Ապօրինի գույքի բռնագանձման մասին» օրենքի նախագիծն ու կից ներկայացված նախագծերի փաթեթը, որը, ըստ էության, թույլ է տալիս բռնագանձել գույքը, որի ձեռքբերումը չի հիմնավորվում օրինական եկամտի աղբյուրներով: Օրենքը վերաբերում է 1991 թվականից հետո ձեռք բերված գույքին: