Հոգեկան առողջության օրն է, իսկ Փաշինյանը Հանրայինին հարցազրույց է տվել

Ինչպես տեղեկացնում է Հայաստանի առողջապատհության նախարարությունը, հոկտեմբերի 10-ը հոգեկան առողջության համաշխարհային օրն է: Այդ առնչությամբ տարածած հաղորդագրության մեջ ՀՀ առողջապահության նախարարությունը նշել է. «Հոգեկան առողջությունը մարդու համընդհանուր իրավունք է, որի պահպանումը կենսական է անձի առողջության և բարեկեցության համար: 
Ապացուցողական բժշկության հիման վրա ծառայություններ մատուցելու, հոգեկան առողջության խնդիր ունեցող անձանց և նրանց ընտանիքների իրավունքների պաշտպանությունն ապահովելու նպատակով հաստատվել է «Հոգեկան առողջության պահպանման և բարելավման միջոցառումների ծրագիրը»`
♦ սահմանվել են մասնագետի գործունեության էթիկայի կանոնները,
♦ մշակվում են կլինիկական ուղեցույցներ և գործելակարգեր,
♦ իրականացվում են հոգեկան առողջության խնդիրներ ունեցող անձանց իրավունքների վերաբերյալ դասընթացներ:
Հաշվի առնելով, որ դեմենցիան ամբողջ աշխարհում հանդիսանում է տարեցների շրջանում հաշմանդամության և ինքնուրույնությունից զրկվելու հիմնական պատճառներից մեկը, հաստատվել է դեմենցիայի կանխարգելման ազգային պլանը: Նպատակն է հիվանդության վաղ ախտորոշման, բուժման, շարունակական հսկողության և առողջ վարքագծի խթանումը, հիվանդության մասին իրազեկման և տեսանելիության բարձրացումը:
Արտակարգ իրավիճակների ժամանակ հոգեկան առողջության ծանր խնդիրներ ունեցողներն առավելապես խոցելի են և հոգեկան առողջության խնամքի կարիք ունեն։
Հոգեկան առողջության վրա պատերազմի ու բռնի տեղահանման թողած ազդեցությունը հաղթահարելու նպատակով ՀՀ առողջապահության նախարարությունը, համագործակցելով մյուս գերատեսչությունների, միջազգային և տեղական հասարակական կազմակերպությունների հետ, սկսել է գնահատել նաև հոգեկան առողջության կարիքները և ապահովել հոգեբանական աջակցությունն ու անհրաժեշտ հոգեկան առողջության ծառայությունների մատուցումը»:
Ի դեպ, ինչպես հաղորդում է «իշխանությանը մոտ կանգնած» «Հայկական ժամանակ»-ը , Նիկոլ Փաշինյանը «Հանրային» հեռուստաընկերությանը հարցազրույց է տվել, որը կցուցադրվի այսօր, երեկոյան: 
Իսկ ովքեր Նիկոլ Փաշինյանի ձայնից և հարցազրույցներից առողջական խնդիրներ են ունենում, կարող ենք առաջարկել, օրվա խորհրդին համահունչ, պարզապես դիտել որևէ «լուրերի թողարկում» կամ վերանայել Միլոշ Ֆորմանի անկրկնելի ֆիլմը՝ «Թռիչք կկվի բնի վրայով»: 

Zham.am