Շվեդիայի հայկական միությունների վարչությունը դատապարտում է Փաշինյանի քաղաքականությունը

«Հրապարակը» գրում է. «Փաշինյանի հայտարարած «սահմանագծում-սահմանազատումն» առաջացրել է ոչ միայն Տավուշի եւ, առհասարակ, ՀՀ քաղաքացիների վրդովմունքն ու անհանգստությունը, այլ նաեւ՝ սփյուռքահայերի: Սփյուռքյան տարբեր կազմակերպություններ, հեղինակավոր հասարակական, քաղաքական գործիչներ հանդես են գալիս Փաշինյանի քաղաքականությունը դատապարտող հայտարարություններով: Նման հայտարարությամբ հանդես է եկել նաեւ Շվեդիայի հայկական միությունների վարչությունը, որտեղ մասնավորապես ասված է.

«Մինչ ադրբեջանական ժողովուրդը եւ լրատվամիջոցներն իրենց նախագահ Ալիեւի հետ տոնում եւ ուրախանում են Հայաստանի սահմանամերձ գյուղերին տիրանալու «հաղթանակով», բոլորովին այլ տրամադրություն է տիրում Տավուշի մարզի գյուղերում, Հայաստանի քաղաքացիների եւ սփյուռքահայերի շրջանում։ Արցախում (Լեռնային Ղարաբաղ) տեղի ունեցած վերջին իրադարձություններից հետո, երբ ադրբեջանական զինված ուժերը վերահսկողության տակ վերցրին դարավոր պատմական հայկական տարածաշրջանը, հայերի էթնիկ զտումները, Արցախի հանձնումը հայերի մեջ հուսահատություն եւ հիասթափություն են առաջացրել: Շվեդիայի հայերը կիսում են այդ զգացողությունները:

Լրագրողների հետ զրույցում վարչապետ Փաշինյանն ընդգծել է, որ սահմանագծումը շատ կարեւոր է ապագա խաղաղության գործընթացի եւ Հայաստանի Հանրապետության տարածքային ամբողջականության վերականգնման համար։ Շվեդիայի հայկական միությունների վարչությունը վարչապետ Փաշինյանին հորդորում է՝ չվտանգել Հայաստանի ապագան՝ հենվելով բացառապես մշուշոտ հույսի վրա: Պետք է որդեգրել հստակ կենսունակ օրակարգ եւ նախապայմաններ՝ խաղաղ գործընթացը հաստատելու համար: Բացի այդ, UAAS-ը կոչ է անում վարչապետին՝ թափանցիկ լինել իր ծրագրերում եւ սահմանազատման գործընթացում: ...Անդրանիկ Քոչարյանն առաջարկել է «ճշտել» 1915 թ. Հայոց ցեղասպանության զոհերի թիվը, սպանված բոլոր հայերի անունները:

Թուրքիայի նախագահ Էրդողանը վերջերս հիշատակեց Հայոց ցեղասպանության մասին՝ խրախուսելով հեռու մնալ նրանից, ինչն ինքն անվանում է «անհիմն հիշողություններ», եւ կենտրոնանալ «ներկա իրողությունների» վրա: Նա հույս հայտնեց, որ Հայաստանը կազատվի հայկական սփյուռքի ստվերից եւ կընդունի ավելի պայծառ ապագա: 2024 թ. ապրիլի 24-ին վարչապետ Փաշինյանը նույնպես հորդորեց հայերին՝ ազատվել ցեղասպանության տրավմայից: UAAS-ը խորապես համոզված է, որ այս հայտարարությունները համընկնում են ավելի լայն օրակարգի հետ, որոնք սահմանվել են Թուրքիայի եւ Ադրբեջանի կողմից: Միությունը վարչապետ Փաշինյանին հորդորում է՝ դադարեցնել օրակարգը, որը դեմ է հայկական շահերին: Սահմանազատման գործընթացը պետք է համապատասխանեցնել հայկական շահերին, պետք է դրվեն նախապայմաններ՝ Բաքվում գտնվող բոլոր հայ քաղաքական ռազմագերիների ազատ արձակումը,  պահանջել ճանաչել Թուրքիայի եւ Ադրբեջանի կողմից հայերի ցեղասպանությունը: ՀԳՄՀ-ն դատապարտում է վարչապետ Փաշինյանի անպատասխանատու եւ չմտածված գործողությունները եւ նրա կապիտուլյացիոն քաղաքականությունը՝ ընդառաջ Ադրբեջանի շարունակվող տարածքային պահանջների: 
Շվեդիայի հայկական միությունների վարչություն»։