Հարցումներն են անհանգստացնում իշխանությանը, որ չեն ուզում գնալ ընտրությունների․ Թագուհի Թովմասյան

«Հրապարակ» թերթը գրում է. «Պատերազմում պարտվելուց հետո «Իմ քայլի» պատգա­մավորներից մի քանիսը, այդ թվում՝ Թագուհի Թովմասյանը, որոշեց դուրս գալ խմբակցությունից և անկախանալ իշխանական թիմից: Այժմ նա գործում է որպես անկախ պատգամավոր: Բայց նրա ընտանիքի քավոր և մտերիմ Սասուն Միքայելյանը, ով միաժամանակ ԵԿՄ նախագահն է, շարունակում է մնալ «Իմ քայլի» անդամ, ավելին՝ նրա ազգուտակը տարբեր պաշտոններ է զբաղեցնում: Միքայելյանը, սակայն, մի քանի ամիս է՝ Ազգային ժողով չի գնում, նիստերին չի մասնակցում, ելույթներ չի ունենում: ԵԿՄ-ում է միայն ժամանակ առ ժա­մանակ հանդիպումներ ունենում և մտքեր արտահայտում պատերազմի հետ կապված: Օրինակ, մի անգամ ասել է՝ սա մեզ համար պարտություն չէր, և հույս է հայտնել, որ մինչև իր մահը ինքը պիտի Շուշիի փողոցներով քայլի:

Թագուհի Թովմասյանից երեկ հետաքրքրվեցինք, թե ինչու իր քա­վոր Սասուն Միքայելյանը չի գալիս նիստերին, ինչու ելույթ չի ունենում, չի խոսում: Թովմասյանը հրաժարվեց այս թեմայով խոսել՝ պատճառաբա­նելով, որ իր և Միքայելյանի միջև սրբություն կա, ինքն իր քավորի մա­սին չի կարող խոսել: «Ես մի անգամ առիթ ունեցա այդ մասին խոսելու և հիմա նորից նույնը պիտի կրկնեմ, որ Սասուն Միքայելյանն իմ ընտանիքի քավորն է, ու նրա մասին, նրա խոսքերի մասին, նրա գործո­ղությունների մասին ես որևէ բան չեմ խոսելու, որովհետև ես հարգում եմ իմ սրբություններին, իսկ մեր մեջ կա սրբություն, մեր միջև կա քավորություն, ու դրանով ես ամբողջովին փակում եմ Սասուն Միքայելյանին առնչվող ցանկացած հարցի պա­տասխան»,- ասաց նա:

Հարցրինք՝ մեր պարտությունը դավաճանության հետևանք էր, Փաշինյանը դավաճան է և միտումնա­վոր է տարել մեզ պարտության, ինչ­պես պնդում են այսօր շատերը, թե այլ ելք չուներ: «Ես ունեմ իմ ձևավորված տեսակետը պարտության մասով, կարծում եմ՝ մենք պարտվել ենք, որովհետև մենք վարել ենք անկազմակերպ պատերազմ, մենք վարել ենք ապիկար, անշնորհք պա­տերազմ, ու այդ վարման տակտի­կան, բնականաբար, բերելու էր նման հանգրվանի: Եվ այդ կառավարման ձևը՝ անիշխանության, երկիշխա­նության, եռիշխանության՝ երբեմն, և այդ անկազմակերպվածության ամենատարբեր դրսևորումներ մենք շարունակում ենք տեսնել այսօր նաև: Կհիշեք Աբու Դաբիի ռազմարդյունա­բերության ցուցահանդեսի պատ­մությունը, որ լոգիստիկ խնդիրների պատճառով մեր զենքը տեղ չէր հա­սել: Սա փոքրիկ օրինակ էր, որն ի ցույց դրեց մեր երկրի կառավարման կոնկրետ սկզբունքները, թե ինչ ձևով են աշխատում մարդիկ: Մարդիկ ասում են՝ լոգիստիկ խնդիրներ ունեն: Այսինքն՝ էդ մարդը չի ընդունում, որ ինքը վատ կառավարիչ է: Եվ եթե դու վատ կառավարիչ ես, բնականաբար, մենք ունենալու ենք ձախողումներ: Եվ այդ ձախողումները միայն քոնը չեն, նաև մերն են, որովհետև դու ես մեր երկրի ղեկավարը, դու ես կոնկրետ ոլորտի պատասխանատուն և դու ես մեզ առաջնորդում: Հիմա նույն իրա­վիճակը եղել է նաև պատերազմում»,- ասաց տիկին Թովմասյանը:

-Իսկ Սերժ Սարգսյանը լա՞վ կա­ռավարիչ էր:

-Ես Սերժ Սարգսյանի կառա­վարման տարիները Ձեզ հետ միասին տասը տարի քննադատել եմ:

-Պարզապես, եթե ասում եք՝ վատ կառավարման արդյունք էր, այսինքն՝ Նիկոլ Փաշինյանի քայլերն ընդամենը վատ կառավարում է ու վե՞րջ, որի հետևանքով մենք այսօր հայրենիք կորցրինք ու հազարավոր զոհեր տվեցինք:

-Այո, և ես դրա համար ասել եմ ու ստացել եմ բավականին ագրեսիվ արձագանք իմ խոսքերին, բայց ես պնդում եմ, որ վատ կառավարիչնե­րը պետք է պատասխան տան իրենց վատ կառավարման համար:

-Դուք միայն դրա համա՞ր դուրս եկաք խմբակցությունից:

-Միայն դրա համար չէ, ես հայտարարել եմ, որ ես դուրս եմ եկել, որովհետև ես չեմ ուզում և չեմ կարող պատասխանատվություն կրել այնպի­սի երևույթների համար, որոնցից տեղյակ չեմ եղել:

-Դուք բացառո՞ւմ եք դավաճա­նությունը, դավադրությունը կամ միտումնավոր պարտության տանե­լու հանգամանքը:

-Այդ դավաճանության մասով ես իմ հոգու խորքում չեմ հավատում կամ չեմ պատկերացնում, որ եղել է դավաճանություն: Իմ համոզմունքն է, և ես շարունակում եմ պնդել, որ մենք վատ կառավարման արդյունքում ունեցանք պարտություն, բայց այդ պարտությունն արդեն բոլորինս է:

-Իսկ Դավիթ Տոնոյանը, գլխա­վոր շտաբի պետը, մյուսներն իրենց մեղքի բաժինը չունե՞ն այս պարտության մեջ, թե վատ կառա­վարիչը միայն Նիկոլ Փաշինյանն է:

-Ոչ, վատ կառավարիչը նաև իրենց է վերաբերում, ու այդ վատ կառավարման ուղղահայացը ես պատկերացնում եմ ամենավերևից մինչև ամենաներքին օղակներ, բայց ոչ՝ շարքային, որովհետև շարքայի­նը կամ մի քիչ ավելի բարձր՝ փոքր հրամանատարական հնարավո­րություններ ունեցող մարդիկ անձնա­զոհաբար կատարել են իրենց աշխա­տանքը, ընդ որում, ես համարել եմ, որ նրանք չեն պարտվել:

-Սերժ Սարգսյանի հարցազ­րույցը, կարծում եմ, դիտել եք, որտեղ նա ասում է՝ իշխանությունը փոխանցել է ոչ թե Նիկոլ Փաշինյանին, այլ Կարեն Կարապետյանին:

-Կարեն Կարապետյանի մա­սով ես ունեմ իմ հստակ դիրքորո­շումը և համարում եմ, որ նախկին իշխանությունների եզակի ներկայա­ցուցիչներից է Կարեն Կարապետյանը, որն ունի հեղինակություն, ունի ռեյտինգ մարդկանց շրջանում: Կարող եք Դուք էլ հարցնել, հաստատ Դուք էլ այդ համոզումը կունենաք, որովհե­տև նախկին իշխանությունները չեն նույնացվում Կարեն Կարապետյանի հետ, և դա միայն իմ կարծիքը չէ: Մի քանի հարցումներ են իրականացրել, և՛ դեսպանատներն են իրականացրել, և՛ հատուկ ծառայություններն են իրա­կանացրել, որոնց մասով ես որոշակի տեղեկության տիրապետում եմ, բայց ես հուսամ, որ էդ հարցումներն ի վերջո մի օր կհրապարակվեն: Ու նաև այդ հարցումներն են անհանգստություն պատճառում իշխանությանը, որ չեն ուզում գնալ ընտրությունների՝

շատ լավ հասկանալով, թե այդ հարցումների արդյունքն ինչ է եղել: Ամեն դեպքում, ինձ համար տխուր էր արձանագրել, որ հիմա արդեն նախկին իշխանությունը փորձում է իր ներսում մեղավորներ գտնել, թե ով Նիկոլ Փաշինյանին բերեց իշխանության: Ես կարծում եմ, որ բոլորը միասին Նիկոլ Փաշինյանին բերեցին իշխանության՝ իրենց կառավարման բոլոր գործողությունների արդյուն­քում:

-Այդ թվում՝ Կարեն Կարա­պետյա՞նը, ով բանտից ազատեց Նիկոլ Փաշինյանին ու նրա ձեռքը բռնած՝ բերեց հրապարակ:

-Այդ թվում»,-գրում է թերթը:

Նյութն ամբողջությամբ կարդացեք թերթի այսօրվա համարում: