Հրադադարի մասին ձեռք բերված պայմանավորվածությունը խախտելը Բաքվի և Անկարայի համատեղ «մեսիջն է»` ուղղված Մոսկվային. Կարեն Վերանյան

Տարածաշրջանային հարցերով փորձագետ Կարեն Վերանյանի խոսքով`հրադադարի մասին Մոսկվայում ձեռք բերված պայմանավորվածությունը խախտելը, նորից Արցախի և Հայաստանի ուղղությամբ կրակ բաց թողնելը Բաքվի և Անկարայի համատեղ «մեսիջն է»` ուղղված Մոսկվային: Նա Tert.am-ի հետ զրույցում նշեց, որ Թուրքիան պարզապես փորձում է հասկացնել Ռուսաստանին, որ իր դերակատարումը Հարավային Կովկասում փորձելու է ավելի շատ ընդգծել:

«Սա ռուս-թուրքական քաղաքական մրցակցության դիմակայության արտահայտման ձև է: Մոսկվան իր դիրքերն է ցույց տալիս` կանչելով արտգործնախարարներին, որ ռազմական հրադադարի շուրջ համաձայնության գան, Թուրքիան էլ փորձում է իր դիրքորոշումը ցուցադրել` Ադրբեջանին հրահրելով, որ կրակը չդադարեցնի»,- ասաց նա:

Ադրբեջանի նախագահն էլ, ըստ նրա, փորձում է այս իրավիճակում Թուրքիայի և Ռուսաստանի հավակնությունների, ցանկությունների և նպատակների իրականացման սցենարում իր խաղը տանել, ապակայունացնել իրավիճակը` ստանալով ինչ-ինչ «խաղաթղթեր»` իր հասարակության աչքերում հաղթանակի իմիտացիա ստեղծելու համար:

«Ալիևը դարձել է գործիք Էրդողանի ձեռքում և հետնահանջի հնարավորություն չունի, բայց նա նաև չունի շատ հեռուն գնալու հեռանկար: Չեմ կարծում, որ Ալիևը իր տնտեսական, ռազմական ռեսուրսներով կկարողանա լայնածավալ գործողությունները շատ ավելի երկար ժամանակով տանել, որովհետև որևէ երաշխիք չկա, որ եթե ռազմական գործողություները երկարեն, Ալիևը կկարողանա պահել իր իշխանությունը»,- ասաց նա:

Ռուս-թուրքական առճակատումը Ղարաբաղյան հիմնախնդրում, ըստ Կարեն Վերանյանի, կարող է նաև ինչ-որ մի պահի թուլանալ` կողմերը գան ինչ-որ փոխհամաձայնության, ինչպես դա եղել է տարբեր տարածաշրջանային հակամարտությունների դեպքում:

«Գալիս է մի պահ, որ կողմերը ինչ-որ մի կոնսենսուսի են գնում: Կարծում եմ, որ այս դեպքում Թուրքիան շատ ավելի կոշտ դիրքորոշում ունի և ամեն գնով փորձում է տապալել ԵԱՀԿ Մինսկի խմբի համանախագահության ձևաչափը, ամեն գնով փորձում է իր ներգրավվածությունը հակամարտությունում օրինականացնել: Պատահական չէր, որ Մոսկվային բացահայտ առաջարկ արեցին երկուսով նստել սեղանի շուրջ, ինչպես Սիրիայում, Լիբիայում` մնացած խաղացողներին` Ֆրանսիային և ԱՄՆ-ին դուրս մղել, ինչին Ռուսաստանը կոշտ արձագանքեց` մերժելով այն»,- ասաց նա:

Այնուամենայնիվ, փորձագետը հավանական համարեց, որ Թուրքիան և Ռուսաստանը մի ինչ-որ պահի փորձեն փոխհամաձայնության գալ նաև հարավկովկասյան ուղղությամբ: «Մենք պետք է հնարավորինս խուսափենք այդ սցենարից, որովհետև պատմությունը և նաև ներկայիս գլոբալ քաղաքական գործընթացներ ցույց են տալիս, որ հակամարտության խաղացողները, այս դեպքում՝ Ռուսաստանը, Թուրքիան, կարողանում են ինչ-որ բան պոկել, իսկ հակամարտության հարթակները հիմնականում տուժում են: Մեր խնդիրն էլ նման սցենարը թույլ չտալն է»,- ասաց նա` նկատելով, որ դա հնարավոր է՝ ռազմի դաշտում հաղթանակ կերտելով և թուրք-ադրբեջանական տանդեմին խաղաղություն պարտադրելով:

Նա նաև նշեց, որ Ադրբեջանի ցանկությունն է անկայունություն ստեղծելը և մեր տարածաշրջանը Սիրիա դարձնելը: «Առավել հավանական է, որ ռազմական գործողությունները շարունակվեն: Ադրբեջանը փորձում է փոքր ռազմական գործողություններով իր ինչ-ինչ նպատակներին հասնել»,- ասաց նա:

Պատասխանելով դիտարկմանը, թե ինչ արձագանք կարող է ստանալ Ադրբեջանի կողմից հերթական ձեռք բերված համաձայնության խախտումը, Կարեն Վերանյանը նշեց, որ միջազգային հանրության արևմտյան հատվածը, փորձը ցույց է տալիս, որ բավարարվում է թեկուզ կոշտ, բայց զուտ հայտարարություններով:

«Շատ կուզեի ընդգծել այս օրերին Հունաստանի, Կիպրոսի, արաբական աշխարհի դերը: Մասնավորապես, Հունաստանը մի քանի գործողություններ իրականացրեց»,- ասաց նա: Նա կրկին ընդգծեց` դա քայլ էր՝ ցույց տալու Թուրքիայի անհամաձայնությունը ձեռք բերված պայմանավորվածություններին, այդ թվում՝ ԵԱՀԿ Մինսկի խմբի դերակատարման շեշտադրմանը:

Հարցազրույցն ամբողջությամբ՝ Tert.am-ում