«EADaily»–ի հարցազրույցը Սեյրան Օհանյանի հետ

«Օհանյան–Րաֆֆի–Օսկանյան» դաշինքի առաջին համար, գեներալ–գնդապետ, ՀՀ պաշտպանության նախկին նախարար Սեյրան Օհանյանը «EADaily»–ի թղթակցի հետ զրույցում խոսել է Հայաստանում տիրող նախընտրական իրադրության, քարոզարշավի ընթացքի, անվտանգության ու արտաքին քաղաքականության մասին։

Սեյրան Մուշեղի, Ձեր անակնկալ մուտքը քաղաքական պայքարի մեջ որոշները բացատրում են նախագահի հետ առկա կոնֆլիկտով, մյուսները՝ նրա հետ ոչ հրապարակային գործարքով: Որո՞նք են իրական պատճառները և ձեր ընթացիկ գործունեության նպատակը:

-Գիտեք` ոչ մեկը, ոչ մյուսը: Ես նախագահի հետ կոնֆլիկտ չունեմ, միևնույն ժամանակ իմ որոշումը երկար էր հասունանում, քանի որ ես ներսից տեսնում ու հասկանում էի, որ պետությունը նախկին  մեթոդներով ղեկավարելն արդեն անհնար է: Երկիրը գտնվում է  լճացման մեջ, նոր որոշումներ ու նոր մարդիկ են անհրաժեշտ հասարակությունում կտրուկ փոփոխությունների համար: Այդ պատճառով ես կտրուկ որոշում ընդունեցի և մտա քաղաքական պայքարի մեջ:

Նախընտրական պայքարը Հայաստանում արդեն երկու շաբաթ է ընթանում է: Ինչպե՞ս եք Դուք գնահատում քաղաքական մրցակցության մթնոլորտը և քարոզարշավն ընդհանուր առմամբ: Որքանով են¸ ըստ Ձեզ իշխանությունների՝ արդար ընտրություններ անցկացնելու մասին խոստումները¸ համապատասխանում իրականությանը: 

-Քաղաքական մրցապայքարի մթնոլորտն ես ընդհանուր առմամբ նորմալ եմ գնահատում¸ սակայն երբեմն տեղի են ունենում իրավիճակներ¸ երբ իշխանության նյարդերը տեղի են տալիս՝ ոչ ադեկվատ դրսևորումներ ունենալով: Իսկ ընդհանուր առմամբ¸ ժողովրդի դժգոհությունը բավայկան մեծ է:

Մենք գրեթե յուրաքանչյուր քայլին բախվում ենք բյուրոկրատական և ադմինիստարտիվ խոչընդոտների: Դժվար է ասել՝ կգնա՞ն իշխանություններն ավելի լուրջ խախտումների¸ ես չգիտեմ: Ինչ վերաբերվում է իշխանությունների՝ արդար ընտրություններ անցկացնելու խոստումներին¸ ապա պետք է նկատել¸ որ բնակչության ճնշող մեծամասնությունը¸ չի հավատում այդ խոստումներին: Իսկ մեր մասով գնահատական կարելի է տալ հենց ընտրությունների ընթացքի ժամանակ:

Ինչո՞վ են պայմանավորված իշխանության կուսակցության և ՕՐՕ դաշինքի կողմնակիցների մասնակցությամբ միջադեպերը Հայաստանի Արմավիրի մարզի Ջրառատ գյուղում:

- Դա ձեր առաջին հարցի շարունակությունն է. իշխանությունները հասկանում են, որ նրանց լուրջ ընդդիմախոսներից մեկը մենք ենք, այդ պատճառով էլ նրանք  հենց մեր դաշինքին  են մեծ «ուշադրություն» դարձնում: Եւ դա արդեն հասկանում են նախընտրական արշավին մասնակցող բոլոր քաղաքական ուժերը:

Ունակ են արդյո՞ք ՕՐՕ դաշինքի թեկնածուները մրցել իշխանության ռեյտինգային թեկնածուների հետ, հաշվի առնելով վերջիններիս  ֆինանսական հնարավորությունները: 

- Դուք իրավացի եք, իշխանական թեկնածուների ֆինանսական հնարավորություններն անսահման են, բայց հարկ է հաշվի առնել նաև այն, որ հասարակությունում առկա է մեծ դժգոհություն, և մարդիկ փոփոխություններ են պահանջում, այդ իսկ պատճառով մարդկանց համակրանքը մեր նկատմամբ, այսպես ասած, կոմպենսացնող դեր է խաղում: 

Պարոն Օհանյան, օրերս «Սասնա Ծռեր»-ի ձերբակալված անդամները և Արցախյան պատերազմի մասնակից Ժիրայր Սեֆիլյանը Արմավիրում տեղ գտած միջադեպի հետ կապված հայտարարություն տարածեցին: Նրանք փաստացի աջակցություն հայտնեցին Ձեր դաշինքի գործունեությանը: Ինչպե՞ս կմեկնաբանեք Երևանում ՊՊԾ գնդի գրավման գործողության մասնակիցների հայտարարությունը: Ընդհանուր ինչպե՞ս  եք գնահատում նրանց գործողություններն այդ օրերին:

- Նախընտրական արշավի ժամանակ մեզ իրենց աջակցությունն են հայտնել շատերը և տարբեր քաղաքական ու հասարակական խմբեր: Մենք, անշուշտ, շնորհակալ ենք նրանց: Ինչ վերաբերվում է ՊՊԾ գնդի գրավմանը, ապա, անկասկած, նման գործողություններին հնարավոր չէ աջակցություն հայտնել: Այլ բան է, որ իշխանությունների գործողությունները հասարակությունում ծայրահեղ բացասական են ընդունվել, իսկ խմբի գործողությունները՝ դրական, և դա փաստ է: Դա խոսում է այն բանի մասին, որ իշխանությունների լեգիտիմությունը շատ ցածր է, և ևս մեկ անգամ ապացուցում է, որ երկիրը լուրջ փոփոխությունների կարիք ունի տարբեր ոլորտներում, եթե դրանք սկսեն ուշանալ, իրավիճակը կարող է անդառնալի լինել: Դրա հետ կապված շատ կարևոր է, որ այդ փոփոխություններն իրականացվեն օրինական հիմքերի վրա և քաղաքական ընտրությունների միջոցով:

Ի՞նչ եք կարծում, Հայաստանը կշահի¸ թե՞ կտուժի խորհրդարանական կառավարման ձևին անցնելուց:

- Իմ կարծիքով կարևոր չէ, թե կառավարման ինչ ձև է պետությունում՝ խորհրդարանական, թե նախագահական: Կան բազում երկրներ, որոնք ապրում և զարգանում են ինչպես խորհրդարանական, այնպես էլ նախագահական կառավարման համակարգի պայմաններում: Եւ հակառակը, կան երկրներ, որոնք տառապում ու գտնվում են լճացման մեջ՝ ինչպես խորհրդարանականի, այնպես էլ նախագահականի պայմաններում:

Տաս բալանոց սանդղակով ինչպե՞ս կգնահատեք Հայաստանի անվտանգության ընթացիկ մակարդակը:

- Գտնում եմ, որ Հայաստանի անվտանգությունը գտնվում է բավականին բարձր մակարդակի վրա, և այստեղ մեծ նշանակություն ունեն Ռուսաստանի հետ մեր դաշնակցային հարաբերությունները, որոնք ռազմավարական բնույթ են կրում և կայունացնող դեր են խաղում տարածաշրջանում:

Ինչպե՞ս կգնահատեք ընթացիկ իրավիճակը ղարաբաղյան հակամարտության գոտում: Ո՞րն է Ձեր միջնաժամկետ կանխատեսումը զարգացման հնարավոր սցենարների հետ կապված:

- Հակամարտության գոտում առկա իրավիճակը կբնութագրեմ որպես շատ փխրուն, քանի որ, ցավոք, Ադրբեջանի վարքը չի կարելի կանխատեսելի և կառուցողական որակել, այդ պատճառով ինչ որ միջնաժամկետ կանխատեսում տալ չեմ կարող:

Հարցազրույցի շարունակությունն՝ այստեղ:

Թարգմանությունը՝ Zham.am-ի