Ինչո՞ւ է Ալիևը համոզված, որ Հայաստանի իշխանությունը մոտ ժամանակներս դուրս է բերելու զորքերը «գրավյալ տարածքներից». Տեսանյութ

Երեկ Ադրբեջանի նախագահն աղմկահարույց հայտարարությամբ է հանդես ելել, նշելով, որ Հայաստանի նոր իշխանությունները մոտ ժամանակներս դուրս են բերելու հայկական ուժերը, այսպես կոչված, «գրավյալ տարածքներից»: Թե ինչով է պայմանավորված նրա այս համոզմունքը, Ալիևը չկոնկրետացրեց` կրկնելով իր հին թեզերը ադրբեջանական բանակի հզորության և Հայաստանի թուլության մասին: Սակայն հետաքրքիր էր, որ այս անգամ Ալիևի հայտարարության մեջ կային «անոնսային» տիպի եզրույթներ և տպավորություն էր առաջանում, որ Ալիևվը ինչ որ բանի մասին է խոսում, որի շուրջ չի ուզում մանրամասնել:

Այս համատեքստում ավելի մտահոգիչ են թվում ԱՄՆ դեսպան Միլսի խոսքերը տարածքների վերադարձի մասին, և Բոլթոնի այն խոսքերը, որ ժամանակն է, որ Հայաստանը վերանայի իր կարծրատիպերը մի շարք հարցերի վերաբերյալ:

Բոլոր այս խոսակցությունները ենթադրությունների մակարդակի վրա են դեռ, սակայն զարմացնում է այն, որ այս տարբեր գործիչների խոսքերի բովանդակությունը իրարից չի տարբերվում: Մինչդեռ, մեզ մոտ այս խնդիրները արծածվում են կենացների ու «գմբ-գմբ-հու»- ի մակարդակով, թեև վերջում նշվում է արդեն կախարդական դարձած եզրույթը, թե իբր «առանց ժողովրդի իմացության ոչ մի հարց թաքուն չի լուծվելու»:

Պարզ է, որ թաքուն ոչ մի բան չի կարող լուծվել, սակայն ցանկացած լուծում ունի իր նախապատմությունն ու պատճառահետևանքային կապը: Կարելի է խայտառակ բանակցություն վարելուց հետո ասել, որ «ժողովուրդ, կներեք, այսպիսին է իրավիճակը»՝ փաստի առաջ կանգնեցնելով մարդկանց:

Այսօր այս հարցում մեր կողմից չկա ոչ մի հստակ տեսակետ, մինչդեռ Բաքվի կողմից տեսակետները հնչում են հստակ ու համոզվունքով, որոնց ձայնակցում են նաև միջնորդները:

Ե՞րբ է վերջապես ավարտվելու այս «պահմտոցին»՝ բանակցային գործնթացի շուրջ: Սա պետություն է, թե մեծահասակների համար մանկապարտեզ, որտեղ ոչ մի առարկայական դիրքորոշում չի հնչում:

Արտակ Հակոբյան