Սերժ Սարգսյանը պատասխանեց Ալիևին, բայց …

Բուլղարիայի նախագահի հետ համատեղ ասուլիսի ընթացքում, օգտվելով առիթից, Սերժ Սարգսյանը վերջապես պատասխանեց Ալիևի այն խոսքերին, թե՝ վաղ թե ուշ ադրբեջանցիները «գրավելու են» Երևանը: Գնահատելով այս մտքերը որպես զառանցանք, Հայաստանի գործող նախագահը նշեց, որ առանց երկկողմանի փոխզիջումների ղարաբաղյան խնդիրը չի լուծվի և իզուր է Ալիևը իլյուզիաների մեջ ընկնում:

Անկասկած, լավ է, որ վերջապես Սերժ Սարգսյանը պատասխանեց Ալիևին, սակայն երկրի քաղաքական դաշտում Ալիևի հոխորտանքները մեծ հաշվով անպատասխան մնացին: Դիցուք, եթե Թրամպը հայտարաեր, որ վաղ թե ուշ ԱՄՆ-ն գրավելու է Ռուսաստանը, թե ինչպիսին կլիներ արձագանքը դժվար չէ կռահել: Կամ Պուտինը հայտարարեր, որ ԱՄՆ-ն կործանվելու է: Վաշինգտոնում Կոնգրեսը հատուկ նիստ կհրավիրեր: Մի բան է, որ Ժիրինովսկին է հայտարարում, մեկ այլ բան, որ դա անում է Պուտինը: Մեկ բան է, որ սենատոր Մաքքեյն է հայտարարում, մեկ այլ բան է, որ դա անի Թրամպը: Սակայն Հայաստանում այս չափորոշիչները չեն աշխատում: Այստեղ այսպես կոչված տնտեսա-քաղաքական վերնախավը կենցաղային արժեքներով է ապրում: Այս մարդիկ չեն հասկանում, թե ինչ բան է պետություն ասվածը:

ՀՀ նախագահի թեկնածու Արմեն Սարգսյանը իբր նախընտրական հանդիպումներ է ունենում, այս դեպքի վերաբերյալ ծպտուն անգամ չլսեցինք: Սա ցույց է տալիս այս մարդու ընդհանուր հոգևիճակը, նրա հետաքրքրությունների տիրույթը, որտեղ միջանձնական հարաբերություններից դուրս այս մարդու գլխավոր կարգախոսը հետևյալն է , «շարժումը ամեն ինչ է, նպատակը՝ ոչինչ»: Բայց այդ կարգախոսով էլ գործում են մյուսները: Դրա համար էլ հասարակ մարդիկ երկրի ապագայի տեսիլքը չեն տեսնում և ով կարողանում է՝ հեռանում է երկրից: Դրա համար էլ Ալիևը լկտիանում է, տեսնելով հայ քաղաքական դաշտի կատարյալ դատարկությունը, ինքն իր մեջ համոզվում է, որ վաղ թե ուշ կարող է դառնալ ոչ միայն Ղարաբաղի, այլև Երևանի տեր ու տիրակալը:

Արտակ Հակոբյան