Ինչ մեսիջ է ուղարկում Իլհամ Ալիևը Սերժ Սարգսյանին ու Վլադիմիր Պուտինին
Ալիևի որոշումը՝ անցկացնել արտահերթ նախագահան ընտրությունններ, անսպասելի էր բոլորի համար: Ոչ ոք չէր սպասում, որ նա կգնար այդ քայլին: Ադրբեջանում ներքաղաքական իրավիճակը հարաբերականորեն կայուն է, սոցիալ-տնտեսական իրավիճակը՝ նույնպես, համաշխարհային նավթի գները կայուն բարձրանում են:
Արդեն երկու օր է, ինչ ադրբեջանական վերլուծաբանները մեկնաբանում են Ալիևի որոշումը, և բոլորն էլ հանգում են այն եզրահանգման, որ Ալիևը ուզում է սինխրոնիզացնել Ադրբեջանի ու Հայաստանի ընտրական գործընթացները, որպեսզի բանակցային գործընթացը կանգ չառնի, և իբր, Հայաստանը չփորձի «սառեցնել» այն:
Բաքվում անկեղծորեն կարծում են, թե իբր Հայաստանն է ժամանակ շահում՝ խուսափելով կատարել իր խոստումները: Ադրբեջանցիները զգուշացնում են նաև, թե իբր, եթե հայկական կողմը չգնա զիջումների, ապա Ադրբեջանը «լեգիտիմ» իրավունք կստանա ինքնուրույն դիմել կտրուկ քայլերի, ինչպես որ դա արեցին թուրքերը՝ Սիրիայում: Չէ որ երկար ժամանակ է, ինչ Անկարան զգուշացնում էր Վաշինգտոնին՝ «մի զինեք քրդերին», սակայն ավաղ, ամերիկացիները չարձագանքեցին այդ կոչերին: Որից հետո Անկարան ստացավ փաստացի «լեգիտիմ» իրավունք՝ ինքնուրույն գործել քրդերի դեմ: Միջազգային հանրությունը թեև չողջունեց, բայց և ակտիվ քայլերի չդիմեց Անկարայի դեմ՝ հասկանալով՝ թուրքերը իրավունք ունեն պաշտպանելու իրենց շահերը:
Իսկ «ինչու Ադրբեջանը չունի իրավունք ինքնուրույն գործելու, եթե միջնորդները չէն կարողանում զիջումներ կորզել Երևանից»,- հռետորական հարցադրում են անում ադրբեջանցի վերլուծաբանները, անկեղծորեն համոզված լինելով, որ հենց Հայաստանը պետք է միակողմանի զիջման գնա: Այս մթնոլորտը գրեթե համատարած է Ադրբեջանում: Այստեղ արդեն ոչ ոք չի հավատում, որ Երևանը կգնա այդ միակողմանի զիջումներին: Չեն հավատում նաև, որ միջնորդները կճնշեն Հայաստանի վրա, և ուրեմն համոզված են, որ միակ ելքը ինքնուրույն գործելն է: Սակայն դրա համար էլ է պետք պատրաստել «լեգիտիմ» հիմք, ինչպես որ արեցին թուրքերը՝ Սիրիայում:
Հենց դա էլ պետք է լինի Ալիևի կառավարման հաջորդ ժամկետը, որն ինչպես հայտնի է ոչ թե 5 այլ՝ 7 տարով է սահմանափակվելու:
Սա է Ալիևի որոշման հիմնական մեսիջը՝ ուղված Պուտինին ու Սարգսյանին, նշում են ադրբեջանցի վերլուծաբանները:
Հակոբ Կարապետյան
Հետևեք մեզ Facebook-ում