Մարդիկ գազազած, անհույս ապրում են․ Կութի նախկին վարչական ղեկավար

Գեղարքունիքի մարզի Կութ գյուղից 2021թ․ հունիսին թշնամու կողմից գողացված 80 խոշոր եղջերավոր անասունների համար որևէ փոխհատուցում մինչև հիմա ոչ ոք չի ստացել։ 5 ընտանիքները, որոնց պատկանում էին այդ անասունները, միայն մարզպետի կողմից մի քիչ օգնություն են ստացել, բայց փոխհատուցում՝ ոչ։

«Մարզպետն ասել է, որ փոխհատուցումը վարչապետի որոշմամբ պետք է տրվի, վարչապետն էլ քաջատեղյակ է այդ դեպքի մասին, բայց մինչև հիմա ոչ մի փոխհատուցում չի եղել»,-«Փաստինֆո»-ի հետ զրույցում ասում է Կութի նախկին վարչական ղեկավար Կիմա Չիտչյանը։

Մինչև 2021թ․ մայիսը՝ Հայաստանի սուվերեն տարածք ադրբեջանական ստորաբաժանումների ներխուժումը, ինչպես տիկին Չիտչյանն է ասում, Կութը Վարդանիսի ենթաշրջանի՝ արոտավայրերով ամենահարուստ գյուղն էր, մարդիկ ապահով ապրում էին, անասնագլխաքանակը տասնյակներով էին հաշվում։

«Որ արոտավայրերն ու խոտհարքերը համարյա լրիվ անցան ադրբեջանցիների հսկողության տակ, մարդիկ ստիպված վաճառեցին անասունների մեծ մասը։ Հիմա մնացած մի քանի գլուխ անասունով մի կերպ յոլա են գնում։ Արածեցնելու համար տնամերձ տարածք են տանում։ Անասունները սոված գնում, սոված հետ են գալիս․ խոտ չկա։ Ձմեռվա համար էլ ուրիշ գյուղերից են առնում։ Մարդիկ գազազած են, անհույս ապրում են»,-ասում է Կութի նախկին վարչական ղեկավարը։

2021թ․ հունիսի 5-ի դեպքից հետո, երբ ադրբեջանցիները կրակելով անասնապահի վրա, գողացել են կութեցի 5 ընտանիքի պատկանող 80 խոշոր եղջերավոր անասուններին, գյուղում ոչ ոք չէր համարձակվում որպես անասնապահ աշխատել։ Չիտչյանն ասում է՝ հիմա մի անասնապահ են գտել բերել, մի 8-10 հոգու անասուն է տանում արածեցնում, բայց գյուղից չի հանում, վախենում է։

Կութի նախկին վարչական ղեկավարի արձանագրմամբ՝ անցած տարվա համեմատ՝ խոտի տուկը մի քիչ էժան՝ 1000 դրամով են առնում։ Այդուհանդերձ, կիսասոված կովերի կաթնատվությունը մոտ չորս անգամ կրճատվել է։ 2021թ հունիսից մինչև հիմա ձգվող անորոշ վիճակից, ինչպես Չիտչյանն է ասում, մարդիկ, իրոք, զայրացած են ու ապագայի հետ կապված որևէ լավատեսական ակնկալիք չունեն։

Հիշեցնենք, որ 2021թ․ մայիսի 12-ից թշնամին, խախտելով հայ-ադրբեջանական սահմանը, առաջ է եկել Սյունիքի և Գեղարքունիքի հատվածներում և առայսօր շարունակում է տեղակայված մնալ ՀՀ սուվերեն տարածքում։

Աղբյուր` Փաստինֆո