Իսրայելը անսպասելի կոպիտ է պատասխանել Էրդողանին
Ինչպես հայտնի է, վերջին օրերին Երուսաղեմում լարվածություն է առաջացել իսրայելական ոստիկանների և պաղեստինցիների միջև, կապված մի քանի իսրայելցի ոստիկանի սպանության կապակցությամբ, որի արդյունքում իսրայելցի ոստիկանները դժվարացրել էին պաղեստինցիների մուտքը դեպի սրբավայրեր:
Իսրայելի այս գործողությունները լուրջ դժգոհություն են առաջացրել ոչ միայն արաբական, այլ նաև մահմեդական աշխարհւմ: Այս առնչությամբ նույնիսկ ՄԱԿ-ի անվտանգության խորհուրդը քննարկել էր այս հարցը և լուծումներ առաջարկել` լարված իրավիճակը լիցքաթափելու համար:
Ինչպես միշտ, այս առնչությամբ մահմեդական աշխարհում իր վարկանիշն է ուզեցել բարձրացնել Թուրքիայի նախագահ Էրդողանը, ով հայտարարել էր, թե իբր այս քայլերով Իսրայելը նպատակ ունի սահմանափակել մահմեդականների մուտքը դեպի սրբավայրեր:
Ի պատասխան դրա, Իսրայելի ԱԳՆ-ի մամլո խոսնակը անսպասելի կոշտ հայտարարությունով է հանդես եկել` նշելով, որ Օսմանյան կայսրության ժամանակներն անցել են, և Էրդողանը պետք է հասկանա, որ Երուսաղեմը դա Իսրայելի մայրաքաղաքան է, իսկ ժամանակակից Թուրքիան լավ կլինի, որ զբաղվի իր ներքին խնդիրներով, քանզի դրանք չափազանց շատ են, հավանաբար ակնարկելով քրդական գործոնը` ընդհանուր առմամբ Իսրայելի պաշտոնյայի կողմից Էրդողանի խոսքերը բնութագրելը որպես անխպատասխանատու և անխոհեմ:
Փորձագետները նշում են, որ արաբական աշխարհի հետ սուր կոնֆլիկտ ունեցող Իսրայելը, ով նաև ունի լրջագույն թշնամի` ի դեմս Իրանի, սովորաբար խուսափում է Թուրքիայի հասցեին սուր քննադատություն հնչեցնել, և սիմպտոմատիկ է այն փաստը, որ այս հարցում առաջին անգամ իսրայելցի պաշտոնյան արագ արձագանքեց Էրդողանին, ինչը վկայում է այն մասին, որ Էրդողանին քննադատելը արդեն Արևմուտքում դարձել է բնականոն նորմ: Խիստ լարվել են թուրք- գերմանական հարաբերությունները, ԱՄՆ- Թուրքիա հարաբերությունները նույնպես վերելքի վրա չեն` կապված այն հանգամանքի հետ, որ Վաշինգտոնն իր հիմնական դաշնակիցն է ընտրել Սիրիայում քրդերին և այլն: Եվ ահա այս ֆոնին Իսրայելը, զգալով այս միջազգային տրենդը, նույնպես փոխում է իր հռետորաբանությունը` Թուրքիայի հանդեպ:
Փաստորեն ստացվեց հետաքրքիր երևույթ: Էրդողանն ու իր թիմակիցները, ովքեր ավելի քան 10 տարի առաջ գալով իշխանության հռչակեցին սկզբունք, որ փորձելու են ունենալ զրո խնդիր հարևանների հետ, այս ավելի քան 10 տարիների ընթացքում նրանք փչացրեցին իրենց հարաբերությունները գրեթե բոլոր այդ երկրների հետ: Եվ այսօր չկա մի երկիր, որի հետ Թուրքիան ունենա նորմալ ռազմավարական հարաբերություններ, իհարկե բացառությամբ Ադրբեջանի:
Հակոբ Կարապետյան
Հետևեք մեզ Facebook-ում