Ինչի՞ դիմաց է Հայաստանը բացել իր օդային սահմանները Ադրբեջանի համար. Լուսանկար, Տեսանյութ

««Ադրբեջանական ավիաուղիները» հոկտեմբերի 6-ից սկսել են օգտագործել Հայաստանի օդային տարածքը Բաքվից Նախիջևան ուղևորափոխադրումներ իրականացնելու համար»,- այս մասին այսօր հայտնեցին բազմաթիվ միջազգային խոշոր լրատվական գործակալություններ:

Իրենց հերթին «Ադրբեջանական ավիաուղիները» տարածել են հետևյալ հաղորդագրությունը. «Հոկտեմբերի 6-ից Հայաստանի տարածքով սկսել է իրականացվել «Բաքու-Նախիջևան-Բաքու» ներքին թռիչքը: Այս քայլը ցույց է տալիս տարածաշրջանում տրանսպորտային հաղորդակցություններն ապաշրջափակելու Ադրբեջանի վճռական պատրաստակամությունը, որը համապատասխանում է սահմանամերձ բոլոր երկրների շահերին:

Ի՞նչ է սա նշանակում:

Հնարավո՞ր է ասել, որ «Հայաստանն անում է իր հաջորդ բարի ժեստը» Թուրքիայի և Ադրբեջանի հետ հարաբերություններում նոր «խաղաղ միջավայր» ստեղծելու ճանապարհին: Իհարկե, խաղաղության ձգտումը դատապարտելի չէ, և տրանսպորտային հաղորդակցությունների ապաշրջափակումը նույնպես, խնդիրն այն է, թե ինչ քաղաքական նախապայմաններ են դրվում այս գործընթացի հիմքում:

Օրինակ ՝ Թուրքիան մինչ այժմ փակ է պահում Հայաստանի հետ իր սահմանները՝ իր պահանջները դնելով պաշտոնական Երևանի առջև: Մինչև 2020 թվականը Ադրբեջանը նույնպես ուներ նման վարքագիծ: Նման պայմաններում, երբ հարցականի տակ է մնում հայ-ադրբեջանական հարաբերությունների ապագան, երբ Գորիս-Կապան ավտոճանապարհը լիովին չի գործում, և 100-ից ավելի հայ ռազմագերիներ գտնվում են Բաքվի բանտերում, որտեղ կտտանքների են ենթարկվում, այս ֆոնին, Փաշինյանի կառավարության քայլը կարելի է անվանել ծայրահեղ ցինիկ:

Ավելին` հայ ռազմագերիների առկայության, գերության մեջ խոշտանգման բազմաթիվ փաստերի առկայության պարագայում նման քայլերը միայն ցույց են տալիս Հայաստանի ներկայիս իշխանության իրական էությունը:

Դասագրքային ճշմարտություն է, որ դեռևս ոչ մի ազգ մուրալով չի հասել խաղաղության, իսկ այն իրավիճակը, որում այսօր գտնվում է Հայաստանը, ակնհայտ է բոլորի համար:

Սակայն դրա համար անհնար է մեղադրել միայն Փաշինյանին, քանի որ մեր այսօրվա հասարակության մեծամասնությունը նման որոշում է կայացրել, և այս մեծամասնության որոշման պատճառով Հայաստանը հայտնվել է այսպիսի ծանր վիճակում: Եվ Աստված մի արասցե, եթե վաղը հայ ժողովուրդը հայտնվի էլ ավելի բարդ եւ ողբալի վիճակում, ապա մենք բարոյական իրավունք չենք ունենա այտ աղետալի իրավիճակի համար ուրիշներին մեղադրելու:

Սա՛ է իրականությունը:

Դավիթ Մկրտչյան