Ղարաբաղից բռնի տեղահանվածին 75 հազար դրամ փոխանցելիս բանկը պահել է 50 հազար դրամ. Գեղամ Նազարյան

ԼՂ-ից բռնի տեղահանվածի կողմից մեկ այլ բռնի տեղահանված անձի հաշվին բանկային փոխանցման ժամանակ 75 հազար դրամից բանկը պահել է 50 հազար դրամը։ Այս մասին հունվարի 10-ին խորհրդարանում Կենտրոնական բանկի ներկայացուցիչների հետ հանդիպման ժամանակ հայտարարեց «Հայաստան» դաշինքի պատգամավոր Գեղամ Նազարյանը։

Նա բացատրեց, որ այս կինը մի ամբողջ ամիս է փորձում է լուծել խնդիրը, բայց չի կարողանում։ «Նրան հայտնել են, որ ԴԱՀԿ-ից տուգանք է եկել, թեև պարզվել է, որ նման բան չկա։ Հիմա նրանից անընդհատ ինչ-որ տեղեկություն են խնդրում, բայց հարցը չի լուծվում»,- հավելեց Նազարյանը։ ՀՀ Կենտրոնական բանկի նախագահ Մարտին Գալստյանն իր հերթին ասաց, որ կարող են լինել բացառիկ դեպքեր, որոնք պահանջում են բացառիկ մոտեցումներ։

Նա խնդրեց պատգամավորին փոխանցել քաղաքացու տվյալները՝ խնդիրը լուծելու համար։