Վրաերթ Երևանում. փողոցը չթույլատրելի հատվածով անցնող կինը տեղում մահացել է

Երևանում մահվան ելքով վրաերթ է տեղի ունեցել։ Ինչպես հայտնում է ֆոտոլրագրող Գագիկ Շամշյանը, այսօր` ժամը 19։55-ի սահմաններում, Կոտայքի մարզի բնակիչ 37-ամյա Մարատ Հ-ն իր վարած «Audi» մակնիշի ավտոմեքենայով Շիրակի փողոցում՝ «Ռենեսանս» ռեստորանային համալիրի դիմաց, մահացու վրաերթի է ենթարկել փողոցը չթույլատրվող հատվածով անցնող 49-ամյա Սվետլանա Ռ-ին։

Վարորդը փախուստի չի դիմել, ահազանգել է շտապօգնություն և ԱԻՆ ՓԾ 911 ճգնաժամային կառավարման կենտրոն։ Դեպքի վայր ժամանած իրավապահները պարզել են, որ վարորդը եղել է սթափ։ Ավտոմեքենան տեղափոխվել է պարեկային ծառայության հատուկ պահպանվող տարածք։ Կայքը նաև հայտնում է, որ Շիրակի փողոցի այդ հատվածում վրաերթի պահին ու դրանից հետո` մինչև ժամը 22։00-ն, լուսավորությունը բացակայել է։