«Եռաբլուրը մեզ հետ կապելը ստորագույն մանիպուլյացիա է». Լևոն Քոչարյան

Խորհրդարանի «Հայաստան» խմբակցության պատգամավոր Լևոն Քոչարյանը ֆեյսբուքյան գրառմամբ արձագանքել է ԱԺ-ում երեկ իր հարցին պատասխանելու ընթացքում Նիկոլ Փաշինյանի մանիպուլյատիվ նենգախոսությանը: 
Լևոն Քոչարյանը գրել է. «Եռաբլուրի հետ մեզ կապելը ստորագույն մանիպուլյացիա է:

Եթե չզլանաք, կարող եք շրջել այդտեղ և ինքներդ համոզվել, թե ինչքան հեռու է Տոյոտան («Տոյոտայի» գրասենյակը - խմբ.) գերեզմաններից, և ինչքան շինություններ, խանութներ կան դրանց միջև: Ու սա օգտագործել մարդկանց էմոցիաների վրա խաղալու համար հերթական ստորությունն է: Սրանց իշխանության օրոք Եռաբլուրը ցավոք 2 անգամ մեծացել է և երևի նպատակ ունեն ավելի մեծացնելու»:
Պատգամավորը ֆեյսբուքյան էջում նաև զետեղել է տարածքի քարտեզային լուսանկար, նշումով, թե որտեղ է գտնվում «Տոյոտայի» գրասենյակը, որտեղ՝ «Եռաբլուրը»: 
Հիշեցնենք, որ հարցուպատասխանի ժամանակ Փաշինյանն ակնարկներ արեց, թե՝ նախկինները «Եռաբլուրից» տարածքներ են սեփականացրել: 
Մեր կողմից նկատենք, որ Փաշինյանի մանիպուլյատիվ պատասխանը, հատկապես «Եռաբլուրի» մասին հիշատակելը, ի լրումն ամենի, ծայրահեղ ցինիզմի դրսևորման նմուշ է: «Եռաբլուրի» տարածքից է խոսում Նիկոլ Փաշինյանի նման մեկը, ում կառավարման հետևանքով «Եռաբլուր» զինվորական պանթեոնի տարածքը, շիրիմների քանակությունը, որ՝ հաստատ, եռապատկվել են: Խոսում է մեկը, ում կեղծավոր «դերասանության» համար, նրա ոստիկանները, նույն այդ «Եռաբլուրի» մուտքի մոտ ոտնատակ են գցել, ծեծել ու քաշքշել են զոհված տղաների ծնողներին ու հարազատներին, որոնք չէին կամենում, որ Փաշինյանի նման մեկը իրենց զավակների շիրմաքարերին մոտենա: 
Կրկնակի ցինիզմ է, երբ Սոնա Մնացականյանին ու նրա չծնված երեխային իր ավտոշարասյամբ մահացու վրաերթի ենթարկած ու տուժողին անօգնական վիճակում թողած, գործնականում նրանց մահվան (սպանության) հիմնական պատճառ դարձած Փաշինյանը համարձակվում է ընդհանրապես որևէ մեկի մասին որևէ բան ասել: 

Zham.am