Բոլոր բուհերը քանդեցին, հասան սլավոնականին

Այսօր Սլավոնական համալսարանի ռեկտորի աջակիցներն ակցիա են անելու։ Արմեն Դարբինյանը նախօրեին հայտարարություն արեց՝ Նիկոլ Փաշինյանին մեղադրելով ազգակործան եւ պետականաքանդ գործունեության մեջ եւ ներկայացնելով, որ իրեն պաշտոնից հեռացնելու գործում նա անգամ ԱԱԾ-ին է ներգրավել։ Դարբինյանն այժմ Մոսկվայում է, բողոքի ակցիային չի մասնակցի։ Զրուցեցինք բուհի դասախոսների հետ։ Հրանտ Բագրատյանն ասաց․ «Դա, իհարկե, վրեժխնդրություն է»։ «Հրապարակ»-ը զրուցեց կրթության նախկին նախարար, ԳԱԱ փոխնախագահ, բուհի մագիստրատուրայի գծով ռեկտորի տեղակալ Էդվարդ Ղազարյանի հետ։

- Բողոքի ակցիային մասնակցելո՞ւ եք, կպատկերացնեի՞ք, որ 80-ին մոտ տարիքում նման ակցիա կանեք։

- Մասնակցելու եմ, իհարկե, ես համալսարանի նվիրյալն եմ արդեն 15 տարուց ավելի։ Կոլեկտիվը գիտեմ, ղեկավարին։ Ո՞վ կարող է չմասնակցել։ Հիմա հերթը հասել է Հայ-ռուսական համալսարանը քանդելուն՝ մյուս բուհերի հարցերը դորդուբեշ արեցին․․․

- Իսկ ինչո՞ւ է իշխանությունը նման քայլերի դիմում Արմեն Դարբինյանի նկատմամբ, որը 18-ին 2 ձեռքով ողջունեց իշխանափոխությունը, բուհի ուսանողությունն ամբողջ կազմով փողոցներում էր՝ Սերժին մերժելու համար։

-․․․ Քննադատողները միշտ էլ սեւ ցուցակում են հայտնվում։ Բայց այստեղ կարեւորը՝ որ կայացած, հաջողություններ ունեցած ուսումնական հաստատությունն ուզում են քանդել։

- Տեղեկություն կա, որ ՊԵԿ-ն է մտել բուհ, ռուսական կողմից՝ աուդիտ։

- Կարծում եմ, ունայն փորձ է, միշտ էլ գալիս են եւ շատ գոհ վերադառնում։ Կարծում եմ՝ այս անգամ էլ այդպես կլինի, պլանային ստուգումներ են։ Ինչ վերաբերում է ՊԵԿ-ին, մեզ մոտ եղել են, ոչ մի դիտողություն չեն ունեցել։

-«Քանդել» ասելով՝ ի՞նչ նկատի ունեք․ ԱԱԾ տնօրենի միջամտությո՞ւնը, թե՞ այլ գործողություններ էլ կան։

- Կարող է քաղաքական երանգ էլ կա, որ ուզում են փոխեն ռեկտորին։ Ոնց որ համալսարանում փոխեցին, ժողինստիտուտում․․․ 2 տարուց ավել Գյումրիում մանկավարժականի ռեկտոր չեն կարողանում ընտրել։ Մտնում են, կոլեկտիվին ալեկոծում, սեւ ու սպիտակի բաժանում, հետ քաշվում, վերջնական լուծումներ էլ չեն տրվում։ 2 տարուց ավել է՝ ԵՊՀ-ն ռեկտոր չունի՝ պաշտոնակատար է։ Նույնիսկ չեն կարողանում կառավարման խորհրդի նախագահ ընտրել։ Ամեն տեղ ավերածություններ են։ Հիմա հերթը հասել է մեզ։

- Իսկ ունե՞ն թեկնածու։

 - Ես չգիտեմ։ Էդքան հեշտ չէ գտնել թեկածու։ Մյուս բուհերում էլ չեն կարողանում գտնել ռեկտոր, իրենց ուզած մարդուն նշանակել։ Դրա համար բարձրագույն կրթության ու գիտության օրենքի մեջ փոփոխություններ են անում, որ 5 տարով պաշտոնակատար նշանակեն, որը հակասում է բոլոր տիպի օրենսդրություններին, այդ թվում՝ Սահմանադրությանը, բուհերի ինքնավարության խնդիր կա։

- Հայաստանում պաշտոնակատարների ինստիտուտը․․․

-Ծաղկում է, որ երբ ուզեն, փոխեն։ Դա աբսուրդ եւ խայտառակություն է․․․ Պաշտոնակատար կարող են նշանակել ինչ-որ ժամանակահատվածում, մի 6 ամսով, մինչեւ նոր մրցույթ եւ ընտրություն։ 5 տարով պաշտոնակատար․․․ 5 տարով նշանակում են ընտրված ռեկտորին, ոչ թե նշանակածին։

- Ձեր բուհը հայ-ռուսական է։

- Ռեկտոր, առանց ռուսական կողմի համաձայնության, չի նշանակվում կամ չի ընտրվում։ Վերջին հաշվով, Հայաստանի կառավարությունը ոչ մի կոպեկ փող չի տալիս։ Բուհն ամբողջությամբ ֆինանսավորվում է Ռուսաստանի կողմից։

«Հրապարակ»