Ադրբեջանի ագրեսիայի հետեւանքով անօթեւան է մնացել Արցախի 40 հազար բնակիչ

Ադրբեջանի ագրեսիայի եւ դրան հաջորդած պայմանավորվածությունների հետեւանքով անօթեւան է մնացել Արցախի 40 հազար բնակիչ: Այս մասին մամուլի ասուլիսի ժամանակ հայտնել է Արտակ Բեգլարյանը, ով այսօր լքել է Արցախի օմբուդսմենի պաշտոնը:

Նրա խոսքով՝ երկու երրորդը անօթեւան է մնացել ագրեսիայի, հրթիռային կամ ավիահարվածների, բնակության վայրերի օկուպացիայի հետեւանքով: Մեկ երրորդը անօթեւան է մնացել քաղաքական պայմանավորվածությունների հետեւանքով, որոնց արդյունքում Ադրբեջանին են անցել Արցախի տարածքները: Բեգլարյանը նշել է, որ աջակցության մի շարք ծրագրեր ընթացքի մեջ են, նախագահը խոստացել է լուծել բնակարանների հարցը 3 տարում:

Նրա խոսքով՝ քրոնիկ անտեսվող խնդիր են սոցիալ-հոգեբանական տրավմաները: Տասնյակ հազարավոր մարդիկ, զոհվածների եւ անհետ կորածների հարազատները, գերության մեջ հայտնվածները, երեխաները վերականգնման կարիք ունեն: Անհրաժեշտ է պետության միջոցով ինստիտուցիոնալ մեխանիզմներ ստեղծել սոցիալ-հոգեբանական տրավմաները բուժելու համար:  

Zham.am