Ո՞վ օգնեց Փաշինյանին հանձնել «դժբախտ» Շուշին

Մեր հասարակությունն ապրում է առասպելներով: Մեր հասարակությունը հաճախ ապրում է ստի մեջ: Մեր հասարակությունը սիրում է լսել միայն այն, ինչը հաճելի է նրա ականջին և շոյում է նրա հպարտությունը:

Մենք հաճախ ասում ենք, որ հենց մենք ենք առաջինն ընդունել Քրիստոնեությունը որպես պետական կրոն: Բայց եթե փիլիսոփայորեն ենք մոտենում մեր կյանքի վերլուծությանը, ապա ինքներս մեզ պետք է հարց տանք՝ արդյո՞ք մենք ապրում ենք քրիստոնեության պատվիրանների համաձայն: Թե՞ մենք կարծում ենք, որ կարելի է հպարտանալ, որ մենք առաջինն ենք ընդունել այս կրոնը, բայց նրա պատվիրանների համաձայն ապրելն այդքան էլ կարևոր չէ:

Մեր հավատքը մեզ տվել է 10 պատվիրան, որոնցից մեկն ասում է. վերևում՝ երկնքում, ներքևում՝ երկրի վրա, և երկրի խորքի ջրերի մեջ եղած որևէ բանի նմանությամբ քեզ կուռքեր չպիտի կերտես (Ելից. 20:4):

Վերջին 2,5 տարվա ընթացքում մեր հասարակության մի զգալի մասը խախտել է այս պատվիրանը: Եվ կարևոր է նշել, որ այս հարցում նշանակալի դեր խաղաց Հայաստանյան մտավորականությունը, որը, ամբոխի ցանկությանը համաձայն, ստեղծեց կուռքի կերպար ի դեմս Նիկոլ Փաշինյանի:

Կարելի է նշել մտավորականության ներկայացուցիչների բազմաթիվ անուններ, որոնք վերջին տարիներին ի կատար էին ածում ամբոխի ցանկությունները, ովքեր ցեխ էին շպրտում բոլորի վրա, ովքեր համարձակվում էին նույնիսկ ողջամտորեն քննադատել Նիկոլ Փաշինյանին: Մտավորականությունը, որին կոչված է կրթել հասարակությանը, լինել նրա համար «առաջնորդող աստղ», որպես օրինակելի կերպար, ինքը սկսեց ընդօրինակել ամբոխը, ինչը Փաշիյանին թույլ տվեց կառուցել իր «ստի թագավորությունը», որը փլուզվելով՝ փլատակների տակ թողեց հազարավոր երիտասարդների կյանքն ու Արցախի պետականությունը:

Լալա Մնացականյանը հատուկ տեղ է գրավում մտավորականության շրջանում: Մի անձնավորություն, որը Սերժ Սարգսյանի նախագահության տարիներին երբեք անձամբ իրեն չի քննադատել (միաժամանակ մասնակցելով տարբեր ակցիաների, որոնք իրականացվել են ցանկացած թեմայով, բայց ոչ քաղաքական և ոչ ընդդեմ նախկին նախագահի), իսկ Փաշինյանի իշխանության գալուց հետո նա դարձել է նրա «անկախ քարոզիչը»: Լալան այնքան հեռու գնաց, որ ասաց, որ մեր հայկական հպարտությունը, մեր Շուշի քաղաքը «Սերժի ժամանակ բոմժանոց էր»: Լալա Մնացականյանի պես մարդիկ էին, ովքեր իրենց հայտարարություններով Շուշին թշնամուն հանձնվելուց հետո Փաշինյանին թույլ տվեցին Ազգային ժողովի ամբիոնից ասել, որ Շուշին «դժբախտ ու դժգույն քաղաք էր»:

Մտավորականությունը պետության «Իմունային համակարգի» մի մասն է: Այն մասը, որը պարտավոր է իր կրիտիկական մտածողությամբ ավելի բարձր լինել, քան շարքային քաղաքացին: Նրա արժեքը պետության համար հենց սրա մեջ է կայանում: Իսկ մեր մտավորականությունը ոչ միայն ավելի բարձր չէր, այլ ինքն օրինակ էր վերցնում ամբոխից:

Մեր մտավորականները ոչ միայն «Իմունային համակարգի» վատ մաս են, այլ նաեւ իրականում վատ քրիստոնյաներ են: Եվ եթե դուք կրիտիկական մտածողություն չունեք, եթե իսկապես արժեքավոր մշակութային գործեր չեք տալիս երկրին,, ապա ո՞րն է ձեր դերը: Ո՞ւմ ու ի՞նչինն եք դուք պետք:

Այն ուժը, որը կգա Փաշինյանից հետո, իրոք պետք է սկսի իր ճանապարհը «Նիկոլի կետից», և այդ կետը բացասական է: Շատ բան պետք է վերանայվի և արվի: Սա վերաբերվում է նաեւ մտավորականության դերին և նշանակության մեր պետության համար: Եթե մենք դա չանենք ու շարունակենք ապրել ստի մեջ, ապա Արցախի պետականության անկումը կհանգեցնի Հայաստանի պետականության անկմանը:

Սևակ Դանիելյան