Օտարերկրյա գործակալներ փնտրելիս

Սեպտեմբերի 21-ին Թուրքիայի պաշտպանության նախարարությունը հանդես է եկել հայտարարությամբ՝ ադրբեջանցի զինծառայողի մահվան հետ կապված: Թուրքիայի պաշտպանության նախարարության  հայտարարության մեջ ընդգծվում է, որ «Հայաստանը պետք է  դադարի կրակի հետ խաղալ»:

Պետք է ընդգծել, որ նման հայտարարություն թուրքական պաշտպանական գերատեսչությունից չի եղել վերջին 30 տարիներ ընթացքում:  Այս հայտարարությունը «արարներից» հերթական էր, որով Թուրքիան էլ ավելի է ակտիվացնում իր ներգրավվածությունը Լեռնային Ղարաբաղի հակամարտության հետ կապված գործընթացում: Ավելացրեք սրան նաև այն, որ Թուրքիան Ադրբեջանի հետ վերջին  լայնածավալ զորավարժություններից հետո մինչ այժմ դուրս չի բերել իր զորքերը և տեխնիկան Նախիջևանից: Շատ վերլուծաբաններ ընդգծում են, որ փաստացի Թուրքիան Նախիջևանում իր ռազմաբազան է հիմնել:

Սա իր հերթին նշանակում է, որ մեր տարածաշրջանում և Հայկական անվտանգության համակարգում շեշտակիորեն ավելացել է ՌԴ-ի դերը՝ որպես Թուրքիայի ռազմական նկրտումները զսպող ուժի:

Կարծես թե այս տարրական ճշմարտությունը պետք է հասու լիներ նաև մեր իշխանություններին, սակայն արի ու տես, որ՝ ոչ: Հենց այս եզրակացության են գալիս, երբ վերլուծում ենք հայաստանի իշխանությունների առանցքային ներկայացուցիչներից մեկի՝ ԱԱԾ տնօրեն Արգիշտի Քյարամյանի վերջերս արած հայտարարությունները:

Հիշեցնենք, որ սեպտեմբերի 21-ին ԱԱԾ տնօրենը եռաբլուրում պատասխանելով լրագրողների հարցին կապված ռուսական «Դոսյե» կենտրոնիի հրապարակած նյութերի վերաբերյալ, նշել է, որ նյութեր են նախապատրաստվում հրապարակմանը համապատասխան իրավական ընթացք  տալու ուղղությամբ:

Ավելին՝  այսօր էլ Ազգային ժողովում ճեպազրույցների ընթացքում «Իմ քայլը» խմբակցության պատգամավոր Ռուբեն Ռուբինյանը, մեկնաբանելով հիշյալ հրապարակման մեջ որոշ քաղաքական գործիչների հայտնվելու փաստը նշեց, որ, եթե այդ անձիք լրագրողների հետ շփումներում չբացատրեն իրողությունը, ապա իրենց համապատասխան հարցեր պետք է տան: Ինչպես տեսնում եք մեր իշխանությունները, փաստորեն, ակտիվորեն օտարերկրյա ազդեցության գործակալներ են փնտրում մեր երկրում:

Ում-ում, բայց ԱԱԾ-ին և նրա ղեկավարի պետք է, որ լավ հայտնի լինի այն անձանց ու կազմակերպությունների ցանկը, ովքեր Հայաստանում տարիներ ի վեր աշխատել են օտարերկրյա գռանտային ծրագրերով: Ում-ում, բայց ԱԱԾ-ին հստակ պետք է հայտնի լիներ նաև, թե իրականում նշյալ անձիք և կազմակերպությունները ում շահերն են սպասարկում և արդյոք այդ շահերը որևիցե աղերս ունեն ՀՀ-ի շահերի հետ:

Պետք է ևս մեկ անգամ ընդգծել, որ հատկապես հուլիսյան դեպքերից հետո ոչ միայն Ռուսաստանի դերն է մեծացել մեր տարածաշրջանում անվտանգություն ապահովելու առումով, այլ նաև ակտիվացել են այն ուժերը, որոնք տարբեր եղանակներով, այդ թվում նաև քաղաքական, փորձելու են նվազեցնել Ռուսաստանի  դերն ու նշանակությունը մեր տարածաշրջանում, ինչն էլ առաջին հերթին բխում է Թուրիքայի և Ադրբեջանի շահերից, քանզի ամենից լավ հենց Անկարայում և Բաքվում են գիտակցում ռուսաստանի ազդեցությունը մեր անվտանգության համակարգում: Այս իմաստով հստակ ուղեգծվում է, թե ինչ ուղղությամբ է պետք գտնել օտարերկրյա գործակալների, սակայն հետևելով հայաստանյան իշխանությունների առանցքային գործիչների հայտարարություններին մենք հայտնվում ենք տրամաբանական կազուսի առջև:

Իհարկե այն փաստը, որ Հայաստանում առ հասարակ բոլոր տիպի գործակալները հանգիստ աշխատում է, դա ողբերգություն է մեր պետականության համար և այս խնդրի լուծման ուղղությամբ պետք է համակարգված, հստակ քայլեր ձեռնարկեն, այլ ոչ թե ընտրովի մոտեցում ցուցաբերվի, ատավել ևս այն պարագայում, որ այդ ընտրովի վերաբերմունքը ակնհայտորեն ուղղված է այն պետության դեմ, որն այսօր տարածաշրջանում միակն է, ով կարողանում է զսպել Թուրքիային:

 Սևակ Դանիելյան