Թուրքական «Daily Sabah»-ը անդրադարձել է Փաշինյանին և վերջին հայ-ադրբեջանական զինված բախմանը

Վերջին ժամանակներս թուրքական մամուլը ակտիվ անդրադառնում է վերջին հայ-ադրբեջանական զինված բախմանը:

2016-ի ապրիլյան պատերազմի ժամանակ Թուրքիան նույնպես ակտիվորեն արձագանքեց, սակայն այս անգամ թուրքերի ակտիվության աստիճանը մեկ կարգով բարձրացել էր:

Անուղղակի դրա մասին խոստանում են նաև թուրքական ԶԼՄ-ները: Այսպես`  Daily Sabah-ը իր երեկվա համարում անուղղակի խոստովանում է, որ 2016-ին Ադրբեջանն էր սկսել պատերազմը: Այսպես, սույն լրատվամիջոցը հետևյալ հարցադրումն է անում:

«...Ինչպե՞ս ստացվեց, որ այս անգամ հայերը դարձան այս վերջին բախումների հեղինակը...» և շարունակում, որ «...Անկարայում անհագստացած են այս կապակցությամբ, քանզի այստեղ համոզված են, որ Երևանն ինքնուրույն  երբեք չէր համարձակվի նման որոշում կայացնել իմանալով, թե ինչ պայմանագրերով են կապված իրար հետ Ադրբեջանն ու Թուրքիան...»:

Եվ ինչպես մյուս լրատվամիջոցներն այս թերթն էլ այն տեսակետն է հայտնում, թե իբր Երևանի այս գործողությունների հետևում կարող է կանգնած լինել Մոսկվան:

Թերթը հիշեցնում է, որ Մոսկվան Անկարայի հետ մրցում է ոչ միայն Կովկասում, այլև Սիրիայում և Լիբիայում: Եվ հավանական է եզրակացնում է թերթը, որ Մոսկվան այս քայլով իբր փորձում է ինչ- որ բան հասկացնել Անկարային:

Սակայն, ըստ թերթի, Անկարան ի տարբերություն նախորդ փուլերի, այլևս չի նահանջելու ռուսների ճնշումներին կովկասյան տարածաշրջանում:

Իմաստ չունի մեկնաբանել այս թուրքական թերթի վարկածը, քանզի ակնհայտ է, որ վերջին գործողություններում Մոսկվան որևէ կապ չի ունեցել: Սակայն, քանի որ Թուրքիան մեծ երկիր է և իր գործողությունները համեմատում է իրեն համարժեք երկրի հետ, ապա անկեղծորեն համոզված է, որ Երևանի գործողությունների հետևում չէր կարող այլ խոշոր խաղացող կանգնած չլինել:

Մյուս կողմից թուրքերը համոզված են, թե իբր Փաշինյանը համաձայնվել էր գնալ այդ քայլին, որպեսզի կարողանար վերականգնել իր փլուզված հեղինակությունը:

Այստեղ էլ են թուրքերը սխալվում, քանզի այս գործողություններից հետո, Հայաստանում կտրուկ մեծացավ ոչ թե Փաշինյանի, այլ  ռուսների գործոնը, իսկ դա Փաշինյանին հաստատ ձեռնտու չէր, քանզի դրանից հետո նա կդժվարանա մոնևրել ռուսների և իր արևմտյան գործնկերների միջև, որոնք պահանջում են Փաշինյանից կտրուկ գործողությունների դիմել ռուսական ուղղությամբ:

Եթե Փաշինյանի համար դա դժվար էր մեկ-երկու ամիս առաջ, ապա այսօր այն դարձել է գրեթե անհնար: Ահա թե ինչու այսօր նա դարձել է առավելապես չխոսկան, քանզի հասկացել է, որ այսօրվա հայաստանյան զարգացման թրենդը ուղղված է իր դեմ և ինքը այլև չի կարող երկար դիմակայել դրան:

Սա է իրականությունը:

Արտակ Հակոբյան