Կարեն Կարապետյանի՝ ՌԴ այցի քաղաքական և տնտեսական ասպեկտը

ՀՀ նախկին վարչապետ Հովիկ Աբրահամյանի՝ «Հանրապետական կուսակցությունից» դուրս գալու փաստը երեկ որոշակիորեն ստվերում թողեց Հայաստանի համար բավական կարևոր մի իրադարձություն: Խոսքը ներկա վարչապետ Կարեն Կարապետյանի՝ Ռուսաստան կատարած այցն է, որի ընթացքում ձեռք բերվեցին նաև երկու երկրների համագործակցության մի շարք պայմանավորվածություններ: 

Ընդգծենք, որ Խորհրդարանական ընտրությունների նախաշեմին ՀՀ վարչապետի այս այցը ավելի շուտ քաղաքական բնույթ ուներ, քան տնտեսական: Այդուամենայնիվ, կանդրադառնանք երկու ասպեկտներին էլ:

Քաղաքական ասպեկտը

Վարչապետ Կարեն Կարապետյանը Մոսկվայում էր ոչ թե աշխատանքային, այլ երկօրյա պաշտոնական այցով:

Սա ամենևին էլ պատահական այց չէ, եթե հաշվի առնենք, որ 2007 թվականից ի վեր ՀՀ ոչ մի վարչապետ պաշտոնական այցով չէր եղել Մոսկվայում՝ ո՛չ Տիգրան Սարգսյանը և ո՛չ էլ Հովիկ Աբրահամյանը:

Այն, որ Կարեն Կարապետյանը ռուսական կողմի հրավերով էր այնտեղ, փաստում է այցի ոչ միայն պատահական չլինելը, այլև խոսում է  քաղաքական կոնկրետ մեսիջի մասին՝ Կարեն Կարապետյանը Ռուսաստանի համար առանձին գործող ֆիգուր է և չի դիտվում՝ որպես Սերժ Սարգսյանի կցորդ:

Տնտեսական ասպեկտը

Կստեղծվի հայ-ռուսական ներդրումային հիմնադրամ

Ինչպես պաշտոնական հաղորդագրություններից ու երկու վարչապետների հայտարարություններից ենք տեղեկանում, պայմանավորվածություն է ձեռք բերվել հայ-ռուսական ներդրումային հիմնադրամ հիմնելու վերաբերյալ, որը հնարավորություն կտա ֆինանսավորելու Հայաստանի համար առաջնահերթ համարվող տնտեսական ճյուղերը:

Թե ինչպես կգործի հիմնադրամը և որքանով արդյունավետ կլինի նրա գործունեությունը, ցույց կտա միայն երկու կողմերի հետագա բանակցությունները:

Ստորագրվեցին տնտեսական համագործակցությանը խթանող մի շարք փաստաթղթեր
Հանդիպման արդյունքում ստորագրվեց Միջտարածաշրջանային համագործակցության ծրագիրը՝ առաջիկա 5 տարվա համար: Խոսքը «Հայաստանի Հանրապետության կառավարության և Ռուսաստանի Դաշնության կառավարության միջև միջտարածաշրջանային համագործակցության 2016-2021 թթ.» ծրագրի մասին է: Ինչպես նաև ստորագրվեց Հայաստանի Հանրապետության տնտեսական զարգացման և ներդրումների նախարարության և Ռուսաստանի Դաշնության արդյունաբերության և առևտրի նախարության միջև համագործակցության հուշագիրը:

Ըստ ձեռք բերված պայմանավորվածության, ՌԴ քաղաքացիները կարող են Հայաստան այցելել նաև ներքին քաղաքացիական անձնագրերով: Հայաստանի Կառավարությունն այս ստորագրված փաստաթղթով հույս ունի նպաստել ՌԴ քաղաքացիների՝ Հայաստան այցելություններին: Այս պայմանավորվածության արդյունավետությունը ևս կերևա միայն ժամանակի ընթացքում:

Մեկ ուշագրավ դրվագ ևս

Կարեն Կարապետյանը երեկ ՌԴ իր գործընկերոջը բավական հետաքրքիր առաջարկություն արեց: Մասնավորապես, կողմերը քննարկեցին Հայաստանում՝ Իրանի հետ սահմանակից հատվածում ազատ տնտեսական գոտու ստեղծման և դրանում ռուսական ընկերությունների ակտիվ մասնակցության հարցը: Սա նշանակում է, որ Հայաստանը Ռուսաստանի համար կարող է դառնալ Իրանի հետ կապող այլընտրանքային ցամաքային ճանապարհ՝ ազատ տնտեսական գոտու կարգավիճակով: Սակայն, հաշվի առնելով Լարսի անցակետում հաճախակի առաջ եկող խոչընդոտները, դժվար է հավատալ, որ Կարեն Կարապետյանի այս առաջարկը կենդանություն կստանա:

Հ.Գ. Ուշագրավ էր նաև այն, որ վարչապետ Կարեն Կարապետյանը իր գործընկերոջը փոխադարձ պաշտոնական այցով հրավիրեց Երևան: Դատելով ռուսական կողմի՝ Կարեն Կարապետյանի նկատմամբ ունեցած քաղաքական վերաբերմունքից, ամենայն հավանականությամբ Մեդվեդևին շուտով կտեսնենք Երևանում՝ պաշտոնական այցով:

Հասմիկ Գրիգորյան