Արտակարգ դրությունը չի օգնել Սերբիայի իշխանություններին. Ո՞ր ճանապարհն են ընտրելու հայրենի իշխանությունները. Լուսանկարներ, Տեսանյութ

Սերբիայում կորոնավիրուսի տարածման պատճառով սահմանափակումների խստացման դեմ բողոքող մի խումբ ցուցարարներ մայրաքաղաք Բելգրադում խորհրդարանի շենք են ներխուժել:

Reuters-ի փոխանցմամբ՝ ավելի վաղ Սերբիայի նախագահ Ալեքսանդր Վուչիչը հայտարարել էր, որ երկրում կորոնավիրուսով վարակման դեպքերի աճի պատճառով ստիպված են շաբաթվա վերջում մայրաքաղաք Բելգրադում խստացնել հակահամաճարակային սահմանափակումները, այդ թվում՝ արգելափակել քաղաքը:

Նախագահ Վուչիչի այս հայտարարությունից հետո հազարավոր դժգոհ քաղաքացիներ Բելգրադի կենտրոնական հրապարակում են հավաքվել՝ երկրի խորհրդարանի դիմաց: Նրանք վարակի տարածման համար երկրի իշխանություններին են մեղադրել՝ հայտարարելով, որ չեն պատրաստվում ևս մեկ անգամ մայրաքաղաքի արգելափակման պատճառով ահռելի վնասներ կրել:

Որոշ ժամանակ անց ցուցարարների մի խումբ, ճեղքելով հսկող ոստիկանական պատնեշը, կոտրել է խորհրդարանի մուտքի դուռն ու շենք ներխուժել, բայց րոպեներ անց ոստիկանական ուժերը նրանց դուրս են բերել այդտեղից:

Ցուցարարների շրջանում նախագահի հրաժարականի կոչեր են հնչել: Ոստիկանությունն արցունքաբեր գազ է կիրառել՝ հեռացնելով ցուցարարներին խորհրդարանի շենքից:

Բողոքի ցույցը կազմակերպվել էր ընդդիմության մի խումբ ակտիվիստների կողմից, որոնք նախկինում բոյկոտեցին երկրում հունիսի 21-ին անցկացվող խորհրդարանական ընտրությունների անցկացումը: Նրանք իշխանություններին մեղադրում են նրանում, որ կորոնավիրուսի պայմանների չի կարելի ընտրություններ անցկացնել, այն էլ երբ դիտորդական առաքելությունների հնարավորությունները սահմանափակ են:

7 միլիոն բնակչություն ունեցող Սերբիայում մինչ այժմ կորոնավիրուսով վարակման 16 168 դեպք է գրանցվել, մահացել է 330 մարդ: Թվերը, սակայն, գնալով աճում են, և վերջին մեկ օրում վարակման 299 և մահվան 13 նոր դեպք է գրանցվել:

Ինչպես տեսնում եք, Սերբիայում կորոնավիրուսով հիվանդների թիվը շատ ավելի քիչ է, քան Հայաստանում, սակայն, մի կողմից, դա չի խանգարում, որ իշխանությունները փորձեն օգտագործել վիրուսը քաղաքական նպատակներով, իսկ մյուս կողմից՝ դա չի խանգարում, որ ընդդիմությունը արտահայտի իր դժգոհությունը այս փաստից:

Այս համատեքստում ես կցանկանայի հռետորական հարց տալ՝ արդյո՞ք ՀՀ կառավարությունը կշարունակի արհեստականորեն երկարաձգել արտակարգ դրությունն իր քաղաքական նպատակներն իրականացնելու համար:

Իշխանությունները պետք է հասկանան, որ երբ իրենք փակում են քաղաքական պրոցեսներն իրականացնելու ընդունված նորմերի և չափանիշների շրջանակներում, սա միշտ առիթ է տալիս ոչ ստանդարտ գործողությունների և գործողությունների: Դրա շնորհիվ, այդ «ոչ ստանդարտ գործողությունների» շնորհիվ էր, որ նախկին իշխանությունը կորցրեց իր դիրքերը: Ամեն ինչ տրամաբանական էր. Պայքարի ինստիտուցիոնալ և համակարգված մեթոդների բացակայությունը հանգեցրեց ոչ համակարգային ակցիաների:

Սևակ Դանիելյան