Հայաստանի կորոնավիրուսային խայտառակ ցուցանիշները փրկօղա՞կ են դարձել Իլհամ Ալիևի համար

Երեկ, հանդես գալով միանգամից երեք նոր մոդուլային տիպի հիվանդանոցների բացման արարողության ժամանակ, Ադրբեջանի նախագահը նշել է, որ խիստ մտահոգված է կորոնավիրուսի տարածման չափով իր երկրում: Հիշեցնենք, որ երեկվա դրությամբ, այդ երկրում վարակվածների թիվը կազմում էր 8191, իսկ մահացածների թիվը` 98: Այս կապակցությամբ Ադրբեջանի իշխանությունները խիստ կարանտինի ռեժիմ են սահմանել երկրում, որտեղ նույնիսկ մարդն իր սեփական մեքենայով  իրավունք չունի դուրս գալ, եթե դրա համար չունի հատուկ իրավունք: Բացառություն են կազմում նրանք, ովքեր մասնակցում են թաղման արարողություններին կամ էլ աշխատում են այն հաստատություններում, որոնց աշխատանքները չեն դադարեցվել:

Զգալով ադրբեջանցիների աճող դժգոհության աստիճանը` Ալիևը փորձել է հանգստացնել իր քաղաքացիներին, որ վարակի տարածման աստիճանի թուլացմանը զուգահեռ կթուլացվեն նաև կարանտինային սահմանափակումները: Ալիևը կրկին  հիշեցրել է իր քաղաքացիներին, որ այս վարակը նաև ազգային անվտանգության սպառնալիք է հանդիսանում` չմոռանալով նշել, որ Հայաստանի համեմատ Ադրբեջանում վարակվածների ցուցանիշը ավելի քան 5 անգամ ավելի ցածր է, քան՝ Հայաստանում, իսկ մահացվածության ցուցանիշը ավեկի քան 7 անգամ ավելի բարվոք է, քան՝ Հայաստանում:

Ալիևի՝  այս ցուցանիշների համեմատականն առաջ բերելը հասկանալի է: Նա իր հանրության առջև փորձում է արդարանալ, որ իրենց մոտ վարակի տարածման աստիճանը ավելի ցածր է, քան Հայաստանում, կարծես դրանով  նա փորձում է համոզել սեփական քաղաքացիներին, որ իր հակաճգնաժամային քաղաքականությունն այդքան էլ վատը չէ: Ճիշտ է, Վրաստանի համեմատ մոտ չորս անգամ ավելի վատն են Ադրբեջանի ցուցանիշները, սակայն առկա է նաև Հայաստանի օրինակը:

Ստացվում է, որ Փաշինյանն իր խայտառակ ցուցանիշներով օգուտ է տալիս Ալիևին՝ դրանով իսկ թուլացնելով նրա հանդեպ քննադատական հոսանքները՝ կորոնավիրուսի դեմ պայքարի հետ կապված:

Սա է իրականությունը:

Արտակ Հակոբյան