ԼՂ տարածքների վերադարձը կարգավորման տարրերից է․ ՌԴ ԱԳՆ

Ադրբեջանի՝ Լեռնային Ղարաբաղի մոտ տեղակայված տարածքների վերադարձը կարգավորման տարրերից մեկն է։ Այս մասին նշվում է ՌԴ ԱԳՆ՝ АПА-ի հարցմանն ի պատասխան տրված մեկնաբանության մեջ՝ ՀՀ ԱԳՆ Զոհրաբ Մնացականյանի հայտարարության վերաբերյալ։ Զոհրաբ Մնացականյանն ավելի վաղ նշել էր, որ ՀՀ համար անընդունելի է ղարաբաղյան հարցի լուծումը, որը ենթադրում է Ադրբեջանին տարածքային զիջումներ։

«Կարգավորման տարրերի թվում են ԼՂ մոտակայքում տեղակայված տարածքների վերադարձը, ինչպես նաև ԼՂ իրավական կարգավիճակի վերջնական որոշումը բնակչության կամարտահայտման միջոցով»,-նշվում է ՌԴ ԱԳՆ մեկնաբանության մեջ։

Գերատեսչությունը հիշեցում է, որ փաստաթղթերը և առաջարկությունները, որոնք դիտարկվել են և դիտարկվում են, հիշատակվում են ՌԴ ԱԳՆ Սերգեյ Լավրովի վերջին հայտարարության մեջ։

«Ղարաբաղյան կարգավորման թեման բավականին նուրբ հարց է և այն հանրային բանավեճերի ոլորտ տեղափոխելն արդյունավետ չէ։ Կարգավորման հարցերը պետք է դիտարկել ստեղծված ձևաչափով բանակցությունների ընթացքում»,-ընդգծել է ՌԴ ԱԳՆ-ն։

Աղբյուրը՝ yerevan.today