«Հնաբնակների» համար ՀՀԿ-ն դարձել է խորտակվող նավ

Հայաստանի Հանրապետական կուսակցությունը վերջին շրջանում մեծ ցնցումներ է ապրում: Մի կողմից ներսում վարչապետ Կարեն Կարապետյանի թիմն է պայքարում բոլշևիկյան մթնոլորտի դեմ, մյուս կողմից՝ այդ կուսակցությանը նախորդ ընտրապայքարներում օժանդակած անձինք այլևս չեն սատարելու Սերժ Սարգսյանին ու նրա թիմին: Նրանցից ոմանք, վարչապետ-նախագահ պայմանավորվածությունների արդյունքում, կա՛մ անտեսվում են «հայրենի» կուսակցության կողմից, կա՛մ ինքնակամ համալրում են քաղաքական լայն դաշինքի շարքերը:

Արդեն քանի օր է մամուլում շրջանառվում են տեղեկություններ, ըստ որի ՀՀ նախկին վարչապետ Հովիկ Աբրահամյանը, ով նախորդ ընտրություններում գլխավորել էր ՀՀԿ-ի նախընտրական շտաբը, Սերժ Սարգսյանի թիմից դուրս գալու քաղաքական որոշում է կայացրել: Սակայն, դեռ հայտնի չէ, թե Հովիկ Աբրահամյանը քաղաքական ի՛նչ դիրքորոշում կորդեգրի՝ առհասարակ կհեռանա՞, թե կմիանա քաղաքական դաշինքներից որևէ մեկին:

Մամուլում հրապարակում եղավ նաև այն մասին, որ ընտրությունների՝ իշխանությունների համար ցանկալի արդյունքների ստացման մեջ զգալի դերակատարում ունեցող որոշ ֆեոդալներ ևս մասնակցություն չեն ունենալու այս ընտրություններում:

Պարզ է, որ Կարեն Կարապետյանն ու իր 7000-ոց թիմը հասարակության շրջանում չի բարելավել ՀՀԿ-ի դիրքերը, հակառակը՝ անձամբ վարչապետի վարկանիշն է տուժել այդ փաստից:

Ստացվում է՝ ՀՀԿ-ն մարզային ու տեղական մակարդակներում փորձելու է հաջողության հասնել «մանր-մունր» «իշխանիկների» հաշվին, ինչի արդյունքում մեծ գզվռտոց է սկսվել իշխանության հենց ներսում:

Կարելի է ասել, որ «հնաբնակների» համար ՀՀԿ-ն դարձել է խորտակվող նավ, քանի որ վստահություն չկա «իշխանիկների» արդյունքների վրա, հատկապես, որ նույն տեղի համար «հարազատ» կուսակցությունից մեկ համայնքում մի քանի «իշխանիկ» է կռիվ տալիս:

Հասմիկ Գրիգորյան