Կորոնովիրուսով հիվանդ էջմիածնեցի կինը ճիշտ էր, Փաշինյանը` սխալվեց

Երեկվա «Շանթին» տված հարցազրույցում Փաշինյանը ևս մեկ անգամ կրկնեց, թե իբր Էջմիածնի հայտնի դեպքը կատարվել էր այնտեղ ապրող կնոջ ամփութության պատճառով: Իսկ, որպեսզի դա ավելի «տեսանելի» դառնա բոլորի համար, նա նշեց, թե այս ողջ կորոնովիրուսային պատմության  ավարտից հետո նա «անպայման պարգևատրելու է առաջին  կորոնովիրուսով հիվանդացած տղամարդուն»:

Ինչո՞ւ է Փաշինյանը ցանկանում պարգևատրել առաջին կորոնովիրուսով հիվանդին, հասկանալի է, որպեսզի ցույց տա, որ կորոնովիրուսը Հայաստանում տարածվել է  ոչ թե իր, այլ  «անգիտակից  քաղաքացիների պատճառով»:

Նրա այս արատավոր մոտեցման բացահայտման համար բացահայտնենք, թե ինչ է եղել իրականում Էջմիածնում:

Եվ այսպես, փորձենք հասկանալ, թե ինչպես վարակվեց Էջմիածնեցի կնոջ շրջապատը, և ում պատճառով:

Եվ այսպես, Փաշինյանի թիրախում հայտնված էջմիածնեցի տիկին Անահիտը Իտալիայից Հայաստան էր վերադարձել սույն թվականի փետրվարի 29-ին: Օդանավակայանում նրանից վերցրել են իր տվյալները և հորդորել, որպեսզի այդ կինը  լուրջ սիմպտոմներ զգալու դեպքում դիմի համապատասխան մարմիններին:

Հիշեցնենք, որ այդ ժամանակ, օրինակ,  Ռուսաստանում բոլոր Իտալիայից վերադարձողներին պարտադիր կերպով  տեղափոխում էին կարանտին: Մենք նույնպես զգուշացնում էինք Հայաստանի իշխանություններին, որ նույնը պիտի իրականացվի նաև մեզ մոտ:

Այդ ժամանակ Փաշինյանը հայտարարոում էր, թե «...կորոնովիրուսը ու՞մ շունն է, որ նրանից վախենանք...»: Իսկ պատկան մարմինները հորդորում էին սույն քաղաքացիներին ընդամենը «ինքնամեկուսանալ»` հույսը դնելով նրանց քաղաքացիական գիտակցության վրա: Մենք այդ ժամանակ նշում էինք, որ նման պայմաններում քաղաքացու վրա պատասխանատվություն դնելը «հանցավոր անփութություն է»,  քանզի քաղաքացին կարող է և առանց միտումի ճիշտ չգնահատել իր վիճակը: Իսկ պետությունն էլ դրա համար է, որ նման պայմաններում ինքն իր վրա վերցնի այդ առաքելությունը:

Սակայն փաշինյանական իշխանության համար գործում է հետևյալ սկզբունքը,- «քաղաքացին պետք է ունենա շատ պարտականություններ պետության առջև, իսկ վերջինս քաղաքացու հանդեպ ոչ մի պարտավորություն, քանզի այստեղ քաղաքացին ինքը պիտի տնօրինի իր ճակատագրին»: Նշենք որ այս սկզբունքը ոչ սոցիալիստական է, ոչ ազատական է, ոչ էլ պահպանողական: Այն կարելի է բնութագրել որպես «քցողական քաղաքացու հանդեպ»: Այդպիսի մոտեցում չկա աշխարի ոչ մի երկրում:

Իսկ հիմի շարունակենք էջմիածնեցի տիկնոջ պատմությունը:

Փետրվաի 29-ին Հայաստան վերադառնալուց հետո նրան ոչ ոք չի զննել: Ավելին, հետագայում, երբ նա դիմել է բժշկին թեթև սիմպտոմների պատճառով վերջինս անլուրջ է վերաբերվել կնոջ բողոքներին: Որից հետո ոչ մի վտանգ չզգալով` տիկին Անահիտը մասնակցել է տղայի նշանադրեքի արարողությանը: Եվ միայն այս ամենից հետո, մարտի 9-ին է ավելի վատ զգացել իրեն  և արդեն ավելի հետևողական է եղել բժիշկին դիմելու հարցում:

Միայն այդ ժամանակ է, որ պատկան մարմինները արձանագրել են, որ այդ կնոջ վիճակը լուրջ է:

Այս ողջ պատմությունից հետո Նիկոլ Փաշինյանը իր կողմից որդեգրած հանցավոր անփույթ մոտեցման մեղքը թաքցնելու համար այս պատմության ողջ մեղքը որոշեց բարդել այդ էջմիածնեցի կնոջ վրա: Քանզի այս պատմության մեջ ակներև երևաց Փաշինյանի մոտեցումը քաղաքացու խնդիրները բարդել իր , այլ ոչ թե պետության վրա:

Փաշինյանի այս մոտեցումը հասկանալի է: Ինչքան լավ բան  կատարվի երկրում, Փաշինյանը պիտի վերագրի իրեն, իսկ բոլոր թերությունները նա փորձում է և շարունակելու է փորձել վերագրել շարքային քաղաքացիների վրա:

Նրա այս խորամանկ մոտեցումը այնքան պրիմիտիվ է, որ դիտորդների մի մասը սխալմամբ նրան համարում են «ծայրահեղ սոցիալիստ», իսկ մյուսները` «ծայրահեղ ազատական»: Իրականում նա ոչ սոցիալիստ է, ոչ էլ ազատական.  նա շարքային, գավառական և կայուն սկզբունքներ չունեցող գործիչ է, ով հանգիստ պայմաններում փորձելու է հանդես գալ «հերոսի» կերպարով, իսկ դժվարին իրավիճակում փորձելու է  ճողոպրել  պատասխանատվությունից, որպեսզի խուսափի համազգային թիրախ դառնալու հեռանկարից:

«Քաջ Նազար» վեպ ունեցող ժողովրդի մոտ դա ինչ- որ ժամանակ «աշխատելու է»: Իհարկե լուրջ ժողովուրդները այդպիսի գործչին  մեկ օր անգամ չէին հանդուրժի: Սակայն հաշվի առնելով 21 դարում ինտերնետի պարագան նույնիսկ հայ ժողովուրդը նման գործչին թույլ չի տա երկար աճպարարությամբ զբաղվել:

Սա է իրականությունը:

Դավիթ Մկրտչյան