Goldman Sachs-ը կանխատեսումը. համաշխարhային ֆինանսական ճգնաժամ չի լինի, սակայն կհիվանդանա բնակչության մոտ 50 տոկոսը

Հեղինակավոր «Forbes» ամսագրին հաջողվել է գաղտնազերծել համաշխարհային հայտնի ինվեստիցիոն խմբի՝ Goldman Sachs-ի փակ քննարկումները կապված կորոնովիրուսի ազդեցության վերաբերյալ համաշխարհային տնտեսության վրա:

Այդ քննարկումներին մասնակցել են նաև ընկերության գլխավոր տնտեսական խորհրդատու Յան Խուցիուսը և գլխավոր բժիշկ Մայքլ Ռենդելը: Քննարկումներն անկացվել են այսպես կոչված «ուղեղային գրոհի» մոդելով, որի արդյունքում հետևյալ եզրակացության են հանգել:

Առաջին

Վարակով պայմանավորված համաշխարհային տնտեսական ճգնաժամը կավարտվի հունիս-հուլիս ամիսների ընթացքում:

Երկրորդ

Ի տարբերություն 2008-ի  համաշխարհային ֆինանսական ճգնաժամ չի սպասվում, քանզի այս փուլում համակարգային խնդիրներ ֆինանսական համակարգում բացակայում են: Ավելին` վիրուսը ավելի կանխատեսելի արհավիրք է, քան ֆինանսական համակարգերի անկանխատեսելի փլուզումները: Այսինքն` ներկա վիրուսի բացասական հետևանքները կանխատեսելի բնույթ են կրում:

Երրորդ

Այս տարվա հունիս-հուլիս ամիսների դրությամբ կարող են վարակվել ամերիկացիների մոտ 50 տոկոսը: Եվրոպացիների 50-ից-70 տոկոսը, սակայն վարակվածների մոտ 80 տոկոսը հիվանդությունը կտանի ավելի թեթև: 15 տոկոսը կունենա միջին ծանրության հիվանդություն և միայն վարակվածների 5 տոկոսը կհայտնվի կրիտիկական վիճակում: Վարակվածների մոտ 70 տոկոսը կլինեն մեծահասակները: Միջին մահացությունը կկազմի մոտ 2 տոկոս: Մինչդեռ 80-անց մոտ այդ ցուցանիշը կգերազանցի 20 տոկոսը:

Չորրոդ

Համաշխարհային ՀՆԱ-ի զարգացման տեմպերը այս տարի կկազմի մոտ 2 տոկոս, ամերիկյան S&P 500 ֆոնդային բորսայի  անկումը կկազմի 15-ից 20 տոկոս:

Հետաքրքիր է, որ ամերիկյան այս հեղինակավոր ընկերության կարծիքով այս վիրուսի ազդեցության հետևանքները պետք է համեմատել ոչ թե 2008-ի ճգնաժամի, այլ 2001-ի ահաբեկչության հետ: Քանզի, ըստ այս ընկերության փորձագետների, այս ճգնաժամի արմատները նույնպես տնտեսական բնույթ չեն կրում, ինչպես որ 2001 թվականի ժամանակ էր:

Բացի այդ, ըստ փորձագետների,  վիրուսի ազդեցությունը հատկապես մեծ է լինելու երկրագնդի հասարակածից  հեռու հյուսիսային աշխարհագրական լայնության 30-ից մինչև 50 աստիճանի սահմաններում:

Վերջում նշենք, որ եթե մոտ են Goldman Sachs-ի փորձագետների գնահատականները ճշմարտությանը, ապա պետք է հիշեցնենք, որ Հայասատանը իր աշխարհագրական դիրքով նույնպես գտնվում է այս վտանգավոր գոտում: Ինչը նշանակում է, որ մենք նույնպես պետք է խիստ միջոցների դիմենք, որպեսզի գոնե մինչև հունիս մեզ մոտ վարակի տարածումը կրիտիկական սահմանից չանցնի:

Սա է իրականությունը:

Արտակ Հակոբյան