Ինչո՞ւ է թանկանում ոսկին

Ոսկու գինը համաշխարհային շուկայում հասել է իր պատմական մաքսիմումին, վերջին 7 տարիների կտրվածքով:  Մեկ տրոյական ունցիան այսօր արդեն արժե  1600 դոլար։ Հիշեցնենք, որ անցյալ տարվա նույն ժամանակահատվածում ոսկու մեկ ունցիայի գինը տատանվում էր 1200 դոլարի սահմանների մոտ: Ոսկին սովորաբար ֆինանսական աշխարհում համարվում է  հանդարտ հանգրվանի տեղ: Այսինքն,  երբ ներդրումները իրական տնտեսության մեջ  ռիսկային են դառնում, մարդիկ նախընտրում են պահել իրենց կապիտալը ոսկու մեջ: Իսկ, երբ դա սկսում է կրել համընդհանուր բնույթ, ապա դա նշանակում է, որ շատ մոտ է համաշխարհային ֆինանսական ճգնաժամը:

Այդպիսի վիճակ եղավ նաև 2008 թվականին: Այն ժամանակ նույնպես ոսկու գինը կտրուկ մեծացավ, և որոշ ժամանակ անց սկսվեց համաշխարհային ֆինանսական ճգնաժամ: Հետաքրքիր է, որ 2008-ից հետո ոսկու գինը շարունակում էր աճել և նույնիսկ 2011-ին մեկ ունցիան արժեցավ 2000 դոլար: Սակայն փորձագետների կարծիքով այդ աճը արդեն սպեկուլյատիվ բնույթ ուներ: Եվ որպես հետևանք, այն ընդամենը մեկ տարվա ընթացքում 2000-ից իջավ մինչև 1300 դոլարի չափ: Այնուհետև սկսվեց ոսկու գնի կայուն անկումը, որի արդյունքում 2012 թվականին ոսկու գինը տատանվում էր 1100 դոլարի սահմաններում: Սա նշանակում էր, որ աշխարհը դուրս էր եկել ֆինանսական ճգնաժամից և մարդիկ գերադասում էին ներդրումներ կատարել տնտեսության իրական հատվածում: Սակայն հետագայում ոսկու գինը սկսեց նորից դանդաղ աճել: Ինչը նշանակում էր, որ համաշխարհային տնտեսական զարգացումը այդքան էլ կայուն բնույթ չուներ: Եվ ահա վերջին տարվա ընթացքում ոսկու գնի աճը կազմեց մոտ 30 տոկոս: Սա ոչ թե բարձր, այլ գերբարձր ցուցանիշ է: Ինչը վկայում է, որ աշխարհը կրկին կանգնած է նոր համաշխարհային ֆինանսական ճգնաժամի առջև:

Արտակ Հակոբյան