Կարող ենք «շնորհավորել» Փաշինյանին. Ղարաբաղի ադրբեջանական համայնքը լուրջ գործոն է դառնում

Երբ Նիկոլ Փաշինյանը անընդհատ խոսում էր «Ղարաբաղին բանակցային կողմ անհապաղ դարձնելու մասին», մենք նշում էինք, որ իր այս պոպուլիստական քայլը վատ է ավարտվելու հենց հայկական կողմի համար: Քանզ պրակտիկ բանակցային գործընթացում կար  Ղարաբաղի կարգավիճակի հարցը, տարածքների վերադարձի խնդիրը, սակայն չկար Շուշիի կամ Ղարաբաղի ադրբեջանական համայնքի խնդիր: Չենք ուզենա այս նուրբ հարցերի մանրուքների մեջ մտնել պարզապես նշենք, որ բանակցային գործընթացը հանրահավաք չէ, և եթե մի կողմը փորձի այս հարցում պոպուլիստական մոտեցումներով հանդես գալ, ապա հետևանքը կարող է լինել չափազանց տխուր: Այն ինչ այսօր կատարվում է բանակցային սեղանի շուրջ հենց դրա հետևանքն է: Ղարաբաղը հենց այսօր  բանակցային կողմ դարձնելու թեման իրականում օգնեց ադրբեջանական կողմին, որ զուգահեռ վերակենդանա, այսպես կոչված Ղարաբաղի ադրբեջանական համայնքի իրավունքների հարցը: Որպես առաջին քայլ այդ համայնքի ներկայացուցչի հետ հերթով սկսեցին հանդիպել ԱՄՆ-ի և Ֆրանսիայի ներկայացուցիչները: Եվ ահա այսօր հայտնի դարձավ, որ   ԵԱՀԿ գործող նախագահի անձնական ներկայացուցիչ Անջեյ Կասպրշիկը հանդիպել է Բաքվում գործող Լեռնային Ղարաբաղի ադրբեջանցիների համայնքի ղեկավար Թուրալ Գյանջալիևի հետ։ Դեսպան Կասպրշիկը շնորհավորել է Գյանջալիևին՝ Ադրբեջանի Միլլի Մեջլիսի պատգամավոր ընտրվելու և Ադրբեջանի Լեռնային Ղարաբաղի ընտրյալ ներկայացուցիչ դառնալու առթիվ»։  Իսկ սա նշանակում է, որ Փաշինյանի համառ ջանքերը Ղարաբաղին գործոն դարձնելու հարցում հակառակ արդյունքն տվեց: Ինչը ենթադրվում էր, որ ինչպես չի կարող տնային տնտեսուհին երկիր ղեկավարել, այնպես էլ պոպուլիստին չի կարելի երկրի ղեկին մոտ թողնել: Քանզի վերջինս բացի պոպուլիստական քայլերից, միտինգային ելույթներից սովորաբար  այլ բանի ունակ չէ:

Եթե նախկինում միջնորդները այցելելով Երևան և Բաքու վերջում այցելում էին նաև Ստեփանակերտ, ապա սրանից հետո միջնորդները Բաքվում երկու հանդիպում են ունենալու: Մի անգամ ադրբեջանական պատվիրակության հետ,  մյուս անգամ՝ այսպես կոչված Ղարաբաղի ադրբեջանական համայնքի ներկայացուցիչների: Ահա այսպիսի «կետին» հասավ իր քայլերով Նիկոլ Փաշինյանը և որը արդեն հետշրջելը կլինի գրեթե անհնար:

Սա է իրականությունը:

Արտակ Հակոբյան