Կառավարելի անձերով ՍԴ ձևավորելու համար իշխանություններն առաջնորդվում են ռեպրեսիվ գործիքակազմով. Էլինար Վարդանյան
Tert.am-ը ԱԱԾ նախկին տնօրեն Արթուր Վանեցյանի՝ Սահմանադրական դատարանի մասին արված հայտարարության և ՍԴ շուրջ ծավալվող իրադարձությունների մասին զրուցել է «Այլընտրանքային նախագծեր խմբի» անդամ Էլինար Վարդանյանի հետ:
-Տիկի՛ն Վարդանյան, մամուլում պարբերաբար տեղեկություններ են հրապարակվում, համաձայն որոնց՝ Սահմանադրական դատարանի դատավորների վերաբերյալ անձնական բնույթի տեղեկություններ են հավաքագրվում իրավապահ մարմիններում, որպեսզի նրանց ճնշեն ընդունել վաղաժամ թոշակի գնալու առաջարկը: Ի՞նչ է սա ենթադրում, և այդ ամենը կանխելու մեխանիզմ կա՞, թե՞ ոչ:
Կարելի է այդ տեղեկություններին հավատալ, կարելի է՝ ոչ, բայց այն, որ իշխանությունները որդեգրել են ՍԴ գործող դատավորներից ազատվելու և վերջիններիս յուրայիններով փոխարինելու քաղաքականություն, ակնհայտ է։ Եվ այս պարագայում «Սահմանադրական դատարանի մասին» ՀՀ սահմանադրական օրենքում ՍԴ այն դատավորների համար, որոնցից ցանկանում են ազատվել, վաղաժամ կենսաթոշակի հնարավորություն նախատեսելը, օրենքն ընդունելուց անմիջապես հետո ՍԴ նախագահ Հրայր Թովմասյանին սահմանադրական դրույթների խախտմամբ մեղադրանք առաջադրելը, նրա մերձավորների նկատմամբ քրեական գործի հարուցումը չեն բացառում ՍԴ դատավորների և նրանց ընտանիքի անդամների անձնական կյանք ներխուժելու վերաբերյալ իրավապահ մարմիններին տրված հանձնարարությունների վերաբերյալ տեղեկատվության հավանականությունը։ Իսկ սա նշանակում է, որ իշխանությունները առաջնորդվում են ռեպրեսիվ գործիքակազմով՝ ՍԴ ազդեցությունից դուրս գտնվող դատավորներից ազատվելու և կառավարելի անձերով ՍԴ ձևավորման համար։ Այս պարագայում պետք է ակնկալել ՍԴ դատավորների արժանապատիվ արձագանք, հավատարմություն իրենց առաքելությանը և անձնական բարձր որակներին։
ԱԱԾ նախկին տնօրենն ասել է շատ պարզ և մատչելի, առանց ավելին ասելու էլ սա իսկապես լուրջ ազդակ է։ ԱԱԾ նախկին պետը խոր անհանգստություններ է ձևակերպում երկրի անվտանգությանը սպառնացող վտանգների վերաբերյալ Սահմանադրական դատարանի շուրջ ծավալվող խմորումների շրջանակներում։ Սա անում է ոչ այլ ոք, քան երկրի ամենաիրազեկ մարդը։ Հետևաբար, հասարակությունը և քաղաքական հանրային շրջանակները պետք է շատ ուշադիր լինեն այս ձևակերպումների նկատմամբ։ Այո, Սահմանադրական դատարանի շուրջ ծավալվող իրադարձությունները վտանգում են ժողովրդավարական և իրավական երկիր ունենալու մեր ձգտումները։ ՍԴ շուրջ ընթացող գործընթացի հենց սկզբից ակնհայտ էին իշխանության ձգտումները, ինչն ակնհայտորեն պետականության դեմ ուղղված քայլ է, որի գնահատականները՝ քաղաքական և իրավական, ապագայում անպայման տրվելու են։
-ՍԴ հարցի ու երկրի անվտանգության միջև զուգահեռներ տանելը որքանո՞վ է ճիշտ, փոխկապակցված: Ինչո՞ւ իշխանությունը չի ուզում անկախ Սահմանադրական դատարան:
ՍԴ դատավորներից ամեն գնով ազատվելու մոտեցումը ազդեցության ակնհայտ մեխանիզմներ ստեղծելու մասին են վկայում։ Այսպիսի մոտեցմամբ վտանգվում է իշխանությունների տարանջատման սկզբունքը, որը իրավական պետության հիմնարար ու սահմանադրական սկզբունքն է։ Կցորդ, իշխանությունների համար ցանկալի, ընդունելի և կախյալ Սահմանադրական դատարանը կորցնելու է իշխանության մյուս ճյուղերը հակակշռելու և զսպելու առաքելությունը։ Առանց այդ էլ Ազգային ժողովը գործում է մեկ կոճակի սկզբունքով։ Եվ եթե դատական իշխանությունը, այս դեպքում՝ ՍԴ-ն, դառնա կցորդ, ևս մեկ «կոճակ», սա շատ ավելի խորքային ազդեցություն է թողնելու մեր պետության վրա, քան մենք պատկերացնում ենք։ Սրան չի կարելի նայել թեթև, չպատկերացնել հետևանքները։
Հետևեք մեզ Facebook-ում