Արարատ Միրզոյանը թաքնված հակահեղափոխակա՞ն է. Նա ձեռնո՞ց է նետում Նիկոլ Փաշինյանին
Այսօր Բաքվում հայերի ջարդերի 30 տարվա կապակցությամբ ՀՀ բարձրաստիճան պաշտոնյաները, Նիկոլ Փաշինյանի գլխավորությամբ այցելել էին Ծիծեռնակաբերդի հուշահամալիր: Պետական այրերը ծաղկեպսակ են դրել զոհերի հիշատակը հավերժացնող հուշարձանին: Այսօր լրագրողները՝ օգտվելով առիթից մի շարք հարցեր տվեցին ԱԺ նախագահ Արարատ Միրզոյանին: Միրզոյանը սկզբից ցույց տվեց, որ չի ուզում պատասխանել լրագրողների հարցերին, իսկ հետո հատուկ կանգ առավ նրանց հարցերին պատասխանելու համար: Ինչը նշանակում էր, որ նա այնուամենայնիվ ցանկանում է խոսել լրագրողների հետ մի շարք հարցերի շուրջ: Բնականաբար, Միրզոյանը չէր կարող չիմանալ, թե ինչ հարցեր էին տալու լրագրողները իրեն: Հետաքրքիր է, որ նա ՍԴ նախագահի հարցը «առաջնայիններից չի համարում» ի տարբերություն նույն Փաշինյանի: Սակայն ամենակարևորը առջևում էր: Պարզվում է նա ԱԱԾ-ի նախկին պետ Արթուր Վանեցյանին քաղաքական հակառակորդ չի համարում, իսկ «ՀԺ»-ի հոդվածն էլ Վանեցյանի մասին համարում է «կենցաղային խոսակցություն»: Այս գնահատականից հետո նա անմիջապես հեռանում է լրագրողների տեսադաշտից:
Ի՞նչ կարող է սա նշանակել: Նախ հետաքրքիր էր, որ Միրզոյանը այսօր ցանկացավ արտահայտվել այս խնդրի շուրջ: Ավելին՝ նա Փաշինյանի թերթի ու նրա դստեր տեսակետները գնահատեց՝ որպես «կենցաղային բնույթի խոսակցություն», իսկ վերջում էլ նա հայտարարեց, որ Արթուր Վանեցյանին «իրենց քաղաքական հակառակորդը չի համարում»: Այս ամենից հետո միայն նա հեռացավ լրագրողների տեսադաշտից:
Սա կարելի է մեկ բառով գնահատել, որ Փաշինյանի անհեթեթ մեղադրանքները գրեթե բոլորի հասցեին արդեն նյարդայնացնում է նույնիսկ իր շրջապատին: Վերջիններս հասկացել են, որ «Փաշինյանի հետ քաղաքական երկար կյանք չեն կարող ունենալ» և փորձում են տարանջատվել նրանից: Անշուշտ սա՝ որպես իշխանության առողջացման հատկանիշ, կարելի է դիտարկել, որը կարող է նաև լուրջ քաղաքական հետևանքներ ունենալ ներկայիս իշխանության հետագա ձևավորման համար:
Սա է իրականությունը:
Արտակ Հակոբյան
Հետևեք մեզ Facebook-ում