Սերժ Սարգսյանը պատրաստվում է փակե՞լ Պետրոսի հաղորդումը

Ինչպես հայտնի է անցած տարվա դեկտեմբերի վերջից Պետրոս Ղազարյանի «Ուրվագիծ» հաղորդումը «Կենտրոն» հեռուստաընկերությունում եթեր չի հեռարձակվում:

Իշխանություններին զայրացրել է, որ Պետրոսը հաղորդմանը հյուրընկալել էր հայտնի դերասան Սերգեյ Դանիելյանին (ёж), ով վերջին ժամանակներս կոմիկական սցենարի շրջանակներում մի թատերական ներկայացում էր խաղարկում «Քաղաքացիական Ակտիվ Քայլ» կուսակցության ստեղծման շրջանակներում, որտեղ հիմնականում ծաղրանքի էր ենթարկվում իշխող ՀՀԿ կուսակցությունը: Եվ ահա այս պատճառաբանությամբ Բաղրամյան 26-ը պատրաստվում է պատժել Պետրոս Ղազարյանին: Այն, որ սույն հանգամանքը ոչ թե գլխավոր պատճառն է, այլ պատրվակ, ակներև է բոլորի համար, քանի որ իշխանության համար իբր գլխավոր թիրախ համարվող Սերգեյ Դանիելյանին արդեն թույլ են տվել շարունակել իր հեռուստահաղորդման կարիերան «Շանթ» հեռուստաընկերությունում: Մինչդեռ Պետրոսի հաղորդումը մինչ այսօր չի բացվում:

Մեր ունեցած հավաստի տեղեկություններով, Պետրոսի ճակատագիրը բուռն քննարկվել է ՀՀԿ գերագույն մարմնի նիստերից մեկում: Ընդ որում, 30-ական թվականների ավանդույթի համաձայն, Պետրոսի «հակահեղափոխական» և «հականժդեհական» դիմակը «պատռել են» կարկառուն «նժդեհական կոլխոզնիկներ» Գագիկ Մինասյանը, Սամվել Նիկոյանը, Հրանուշ Հակոբյանը և այլք: Այս ամոթալի մթնոլորտում քիչ թե շատ ողջամիտ տեսակետներ են փորձել հայտնել Արմեն Աշոտյանն ու Սամվել Ֆարմանյանը, որոնք հիմնավորել են, որ Պետրոս Ղազարյանի հաղորդման փակումը հիմնականում «կխփի» Սերժ Սարգսյանի իմիջին, որին հակադարձել է ՀՀԿ-ի «ծանր հրետանի» Էդուարդ Շարմազանովը, ով նշել է, թե Պետրոսի հաղորդման փակումից ՀՀԿ-ն ավելի շատ կշահի, քան կկորցնի, իսկ Սերժ Սարգսյանի իմիջին էլ չի վնասի:

Սերժ Սարգսյանը լուռ հետևել է այս բանավեճին և գերադասել է իր տեսակետը չհայտնել, ինչը նշանակում է, որ իր մեջ դեռ վերջնական որոշումը չի կայացրել: Այս հարցով ցցուն բացահայտվել է այն մթնոլորտը, որն իշխում է ՀՀԿ-ում: Ըստ երևույթին, այս «նժդեհակոլխոզնիկական» կուսակցությունը ավելի ու ավելի է սկսում նմանվել ԽՍՀՄ ժամանակների ստալինաբրեժնևյան կոմկուսին, սակայն մեկ տարբերությամբ՝ 30-40-ական թթ. նման կուսակցությունով հնարավոր էր կառավարել երկիրը, քանզի այդպիսին էր մթնոլորտը ողջ աշխարհում: 20-րդ դարի 80-90-ական թթ. այդ կառույցը դարձել էր արդեն հնամաշ և որի պատճառով էլ այն կազմալուծվեց՝ իր հետ փլուզելով նաև ԽՍՀՄ-ը: Մեր օրերում, երբ մարդիկ ինֆորմացիա են ստանում ոչ միայն պաշտոնական աղբյուրներից, այլև համացանցից, նման պարզունակ կառավարումը ավարտվելու է անփառունակ ձևով: Եվ վերջապես, եթե Սերժ Սարգսյանը որոշում կայացնի փակել Պետրոսի հաղորդումը, ապա դրանով նա վերջակետ կդնի իր լիբերալ համբավին, որ նա ունի լրատվամիջոցների նկատմամբ:

Ի դեպ, նշենք, որ Սերժ Սարգսյանի կառավարման այս ինն տարիներիընթացքում սա միակ ձեռքբերումը կարելի է համարել, քանզի կյանքի գրեթե մնացած բոլոր բնագավառները նա գրեթե ամբողջովին տապալել է՝ հայ-թուրքական հարաբերություններ, Ղարաբաղի խնդիր, Հայաստան-Արևմուտք և Հայաստան-Ռուսաստան բալանսավորված հարց, խաղաղ ժամանակներում 14,4 տոկոս տնտեսական անկում, ներդրումների քառապատիկ կրճատում, ազգային դեմոգրաֆիկ աղետալի իրավիճակ՝ արտագաղթով և այլնով պայմանավորված, Ղարաբաղում տարածքների կորուստ և այլն:

Արտակ Հակոբյան