Ադրբեջանական մամուլը հրճվանքի մեջ է. Փաշինյանը մաքրում է Ղարաբաղը... ղարաբաղյան կլանից (Տեսանյութ)
ԼՂՀ-ի պաշտպանության նախարարի հրաժարանը լայնորեն լուսաբանվում է ադրբեջանական մամուլում: Ադրբեջանցի վերլուծաբանները հատուկ ընդգծում են, որ այդ հրաժարականը տեղի ունեցավ Նիկոլ Փաշինյանի ու Բակո Սահակյանի հանդիպումից անմիջապես հետո: Իսկ սա նշանակում է , որ Մնացականյանի հրաժարականի համար, ամենայն հավանականությամբ, պնդել է անձամբ Փաշինյանը: Ադրբեջանցիների կարծիքով, այդ հրաժարականը առաջինն է, սակայն վերջինը չէ: Քանզի, ըստ նրանց, ղարաբաղյան խնդրին խանգարում են նաև այլ ռազմատենչ գործիչներ:
Քաղաքագետների մյուս մասի կարծիքով էլ այստեղ կարևորը ոչ թե կադրային փոփոխություններն են, այլ այն ցնցումները, որոնք կարող են լինել Ղարաբաղյան իշխող վերնախավում, քանզի այդ դեպքում հնարավոր կլինի կազմաքանդել ղարաբաղյան միասնական կառավարման բուրգը և կազմալուծել ղարաբաղցիների ռազմական մեքենան:
Ըստ վերլուծաբանների, Բաքվում ուշադրությամբ են հետևում այդ գործընթացին, և ճիշտ պահին պետք է կարողանան վճռական հարված տալ, որպեսզի 2016-ի ապրիլը չկրկնվի: Վերլուծաբանները հիշեցնում են, որ այն ժամանակ ադրբեջանցիներն ունեին ռազմական առավելություն, սակայն ղարաբաղյան ռազմա-պետական մեքենան կազմաքանդված չէր, դրա համար էլ ադրբեջանցիների առաջխաղացումը սահմանափակ բնույթ ունեցավ: Դրա համար էլ, նշում են ադրբեջանցի վերլուծաբանները, անչափ կարևոր է, որ ղարաբաղյան պետական բուրգը կազմաքանդվի հենց Երևանի, իսկ ավելի կոնկրետ՝ Փաշինյանի ձեռքերով:
Այս հարցում, սակայն, վերլուծաբանները տարակարծիք են: Մի մասի կարծիքով Փաշինյանին հնարավոր է պարտադրել խաղաղ ձևով դուրս բերել հայկական զորքերը «գրավյալ» տարածքներից, իսկ մյուսների կարծիքով Փաշինյանը, եթե նույնիսկ ցանկանա էլ, չի կարող այն իրականացնել, քանզի դրան կխանգարի հանրային կարծիքը: Ըստ վերլուծաբանների, պետք է օգտագործել նրա դեստրուկտիվ պոտենցիալը՝ Ղարաբաղը ներսից կազմաքանդելու համար:
Բացի այդ, նրա եսակենտրոն պահվածքը ՀԱՊԿ-ում և նույնիսկ Ռուսաստանի հետ փոխհարաբերություններում նույնպես կնպաստի, որ Բաքվի ռազմական գործողությունները ըմբռնումով ընկալվեն այդ տիրույթից, նշում են վերլուծաբանները:
Ինչ վերաբերվում է Վաշինգտոնին, ապա այստեղ, ըստ վերլուծաբանների, արդեն տեղյակ են Բաքվի պլաններին, և նույնպես ըմբռնումով կվերաբերվեն Ադրբեջանի ծրագրերին, քանզի ուժեղ Ադրբեջանը ԱՄՆ-ի կարևոր ռազմավարական խնդիրներից է դարձել: Մանավանդ որ այդ ուղենիշում է գտնվում նաև Իսրայելը: Բացի այդ, Վաշինգտոնի ու Անկարայի հարաբերությունները աննախադեպ ձևով գնում են դեպի լավացման: Վաշինգտոնը պատրաստ է Էրդողանին հանձնել նրա թիվ մեկ թշնամուն՝ Գյուլենին: Բացի այդ, ամերիկացիները վերջնականապես պատրաստվում են հրաժարվել քրդերի աջակցությունից՝ Սիրիայի տարածքում:
Ադրբեջանցի վերլուծաբանները նշում են, որ Իրանը դարձել է Վաշինգտոնի համար իդեա-ֆիքս, և քանի դեռ Փաշինյանը Երևանում է, պետք է արագ օգտագործել այս պատմական հնարավորությունը, քանզի պատմությունը նման եզակի շանսեր քիչ է տրամադրում և շատ կարճ ժամկետով:
Արտակ Հակոբյան
Հետևեք մեզ Facebook-ում