Ապագա խորհրդարանում թեժ է լինելու՝ երգիչ, լրագրող, թիկնապահ, գիշերային ակումբի մենեջեր

Դեկտեմբերի 9-ին կայանալիք խորհրդարանական ընտրություններին մասնակցող ուժերի նախնտրական ցուցակներն արդեն հրապարակային են: Ինչպես նախորդ ընտրություններում, այս անգամ ևս, դրանք անակնկալներով հարուստ էին: Քաղաքական ուժերն իրենց կազմում միավորել են տարբեր մասնագիտությունների և զբաղմունքների տեր անձանց` նախկին և ներկա պաշտոնյաներ, լրագրողներ, երգիչներ, հաղորդավարներ, թիկնապահներ, տաքսու վարորդ, գիշերային ակումբի մենեջեր, մի խոսքով` ապագա խորհրդարանում թեժ է լինելու:
Ինչևէ, ցուցակների կազմը շարունակում է մնալ քաղաքական և հասարակական սեկտորի թոփ թեման: Եվ այս օրերին պարբերաբար բացահայտումներ են լինում, թե այս կամ այն թեկնածուն հատկապես որ արժանիքի համար է հայտնվել ցուցակում, և ինչպես հայտնի խոսքն է ասում` այս խմորը դեռ շատ ջուր է քաշելու:

Քաղտեխնոլոգ Վիգեն Հակոբյանը նախընտրական ցուցակների այս պատկերը պայմանավորում է Ընտրական օրենսգրքի և դրանում ամրագրված ռեյտինգային համակարգի պահպանմամբ:

«Ցուցակները կազմել են հենց ռեյտինգային ընտրակարգի տրամաբանության մեջ, որպեսզի կարողանան ապահովել երկու ընտրական համակարգերի համամասնությունը, քանի որ ընտրությունների վերջնական արդյունքները որոշվում են 50/50 համադրությամբ: Դրանցում ընդգրկված են  և մաքուր քաղաքական դեմքեր, և մարդիկ, ովքեր առաջադրվելու են ռեյտինգային համակարգով և ձայներ են բերելու այդ կուսակցությանը: Եթե ցուցակում լինեն միայն մարդիկ, ովքեր ունեն քաղաքական իմիջ և բովանդակություն՝ առանց հանրային  լուրջ ընկալման և ճանաչման, նամանավանդ մարզերում, ապա այդ ուժը չի կարող լուրջ ձայներ ստանալ»,- Zham.am-ի հետ զրույցում նման կարծիք հայտնեց քաղտեխնոլոգը:

Մեր այն դիտարկմանը, որ հատկապես հակասական ձևով ընդունվեց այն հանգամանքը, որ ցուցակներում ընդգրկված են այնպիսի դեմքեր, որոնք ոչ միայն հեռու են քաղաքականությունից, այլև հասարակության մոտ այլ ընկալումներ են առաջացնում` ինչպես օրինակ Գագիկ Ծառուկյանի թիկնազորի պետ Էդուարդ Բաբայանը, ՔՊ ցուցակում ընդգրկված գիշերային ակումբի մենեջերը և պաշտոնյաների հետ խնամի-բարեկամական կապերով հայտնի մի շարք այլ անձինք, Վիգեն Հակոբյանը պատասխանեց. «Սա նույնպես ռեյտինգային համակարգի տրամաբանության մասին է խոսում, իրենք որևէ քաղաքական իմաստ չեն արտահայտում, բայց տվյալ մարդիկ կարողանում են ձայներ բերել` թաղային հեղինակությունների և իրենց շրջապատի միջոցով: Եվ եթե նույնիսկ իրենք չեն անցնում, այնուամենայնիվ, կուսակցությանը ձայներ բերում են: Եթե կուսակցությունը անգամ ինչ-որ շատ վեհ գաղափարներ և նպատակներ ունենա, շատ դեպքերում ստիպված է լինում պրագմատիկ խնդիրներ դնել և իր ցուցակում ընդգրկել մարդկանց, ովքեր կկարողանան ռեալ ձայներ բերել: Դա անխուսափելի է: Հաղթում է նա, ով մեծ շրջապատ և կապեր ունի»:

Ակաթի Վահանյան