Ինչու՞ Փաշինյանը չհանդիպեց ՀՅԴ-ի հետ, և ինչ դիրքորոշում ունի նա այս ուժի նկատմամբ

Այդ նույն օրը, երբ Փաշինյանը հուշագիր էր կնքում Ծառուկյանի հետ, ՀՅԴ-ի հետ բանակցություններ էր վարում փոխվարչապետ Տիգրան Ավինյանը: Հասկանալի է, որ Փաշինյանի բանակցությունները Ծառուկյանի ու ՀՅԴ-ի ներկայացուցիչների հետ տարբեր բնույթ ունեին: Եթե Ծառուկյանի հետ խոսվում էր ԲՀԿ-ի ապագա տեղի ու դերի մասին ապագա ԱԺ-ում, ապա ՀՅԴ-ի հետ Փաշինյանը այդպիսի խոսակցության թեմա չուներ: Ավելին, Փաշինյանը ՀՅԴ-ին չի տեսնում ապագա ԱԺ-ում, բայց չի էլ ուզում, որ դաշնակցականները ապագա ընտրությունները բոյկոտեն: ՀՅԴ-ի կողմից ընտրությունների հնարավոր բոյկոտը եթե ոչ հիմա, ապա հետագայում կարող է գլխացավանքի թեմա դառնալ Փաշինյանի համար: Բացի այդ, նա ուզում է դիվիդենտներ քաղել` Սփյուռքում ՀՅԴ-ի գործոնը օգտագործելով: Ահա թե ինչու նա մի կողմից չի ուզում նեղացնել դաշնակցականներին, իսկ մյուս կողմից նա չի տեսնում այդ ուժին ապագա ԱԺ-ում: Իհարկե լավագույնը, ըստ Փաշինյանի, կլիներ այն, որ դաշնակցականները մասնակցեին գալիք ընտրություններին, այսինքն չբոյկոտեն և դուրս մնան ապագա խորհրդարանից: Այդ դեպքում Սփյուռքի դաշնակցականներին Փաշինյանը ցույց կտար, որ մեղավորը ինքը չէ, այլ ՀՅԴ-ի հայաստանյան կառույցն է, որը երկար տարիներ համագործակցելով ՀՀԿ-ի հետ, կորցրել է իր հեղինակությունը հանրության մոտ:

Այդ իսկ պատճառով Փաշինյանի խնդիրը ՀՅԴ-ի նկատմամբ ժամանակ ձգելն ու թույլ չտալն է, որ վերջիններս հրաժարվեն՝ գալիք ընտրություններին մասնակցելուց և առավել ևս փորձեն բոյկոտել այն:

Ինչ վերաբերվում է ՀՅԴ-ի ներկայիս վերնախավին, ապա այստեղ տիրում է անորոշություն, քանզի նրանք չգիտեն թե ինչ դիրքորոշումով հանդես գան գալիք ընտրությունների հանդեպ:

Արտակ Հակոբյան