Թիկունքը ամրապնդելու միակ հնարավոր տարբերակը

Լեռնային Ղարաբաղի հակամարտության խաղաղ և հայանպաստ կարգավորումը շարունակում է մնալ հայկական պետականության այն անկյունաքարային հարցերից մեկը¸ որի շուրջ էլ շարունակվում են պտտվել Հայաստանի քաղաքական գործընթացները: Ապրիլյան պատերազմը ցույց տվեց¸ որ վերջին տարիների ընթացքում Սերժ Սարգսյանի կողմից իրականացված քաղաքականությունը հանգեցրել է նրան¸ որ թուլացել է թե´ թիկունքը և թե´ հայկական բանակը¸ ինչն էլ իր հերթին Ադրբեջանին դարձրել է ավելի ագրեսիվ¸ քանի որ թշնամին շատ լավ զգում է մեր թուլությունը:

Թիկունքի և բանակի թուլացման գործընթքացը երեկ չի սկսվել: Այն սկսվել էր տարիներ առաջ¸ երբ 2008թ մարտի 1-ի գնով Սերժ Սարգսյանը եկավ իշխանության և լայնմասշտաբ պայքար ծավալեց թե´ մանր¸ թե´ միջին և թե´ խոշոր բիզնեսի դեմ՝ իր համար վերջնական նպատակ հռչակելով գերկենտրոնացված քաղաքական և տնտեսական համակարգի ձևավորումը¸ որի գլխին ցմահ պետք է անձամբ նա իշխի: Այդ գործընթացը իրականացնելու ժամանակ Հայաստանի տնտեսությունը ստացավ այնպիսի հարվածներ¸ որ ունակ չեղավ ապահովել բանակի արդիականացումը¸ ինչի հետևանքով մենք ապրիլին տվեցինք ավելի քան 100 զոհ և «անպետք» հողեր հանձնեցինք թշնամուն: Բազմաթիվ թե հայաստանյան¸ թե միջազգաին փորձագետների գնահատականներով՝ ապրիլյան պատերազմի տիպի ռազմական գործողությունները կարող են մոտակա ժամանակներում կրկնվել և իրենց մասշտաբներով անգամ գերազանցել անցյալ տարվա դեպքերի ծավալին: 

Հայկական կողմի համար միակ հնարավոր ելքն այս իրավիճակից այն է¸ որ պետք է ամրապնդվի հայկական բանակի թիկունքը¸ այն է՝ զարգանա տնտեսութունը¸ ինչի արդյունքում հնարավոր կլինի հայթայթել անհրաժեշտ միջոցները բանակը վերազինելու և տարածաշրջանում ուժերի հավասարակշռությունը վերականգնելու համար: Փետրվարի 13-ին ստորագրված Օհանյան-Րաֆֆի-Օսկանյան դաշինքի փաստաթուղթը իր մեջ հստակ ուղերձ է պարունակում մեր հանրությանը¸ որում ներկայացվում է ղարաբաղյան հակամարտության կարգավորման ու դաշինքի տեսլականը.

«Մենք համոզված ենք, որ Արցախի խնդրի խաղաղ կարգավորման համար հայկական կողմը պետք է ուժեղացնի ռազմական կարողություններն ու անվտանգության մակարդակը և վերականգնի տարածաշրջանի ռազմաքաղաքական հավասարակշռությունը, ինչի արդյունքում հնարավոր կլինի կանխել հակառակորդի կողմից նոր ագրեսիայի ցանկացած փորձ, իսկ նման փորձի դեպքում՝ պարտադրել խաղաղություն»:

Դաշինքի անդամ ուժերը և գործիչները հստակ գիտակցում են¸ որ առանց նոր որակի իշխանության ձևավորման¸ լուծել վերոհիշյալ հարցը հնարավոր չէ¸ հետևաբար անհրաժեշտ է բոլոր ռեսուրսների միավորմամբ գնալ ընտրություններին՝ հաղթելու և նոր իշխանության ձևավորման գործընթաց նախաձեռնելու մտայնությամբ: Բոլորը քաջ գիտակցում են¸ որ թիկունքի ամրապնդման և Լեռնային Ղարաբաղի կարգավորման բանալին գտնվում է Երևանում և այս պահին պետք է նպատակ հռչակել այդ բանալիին տիրանալ:

Արմեն Միքայելյան

Հ.Գ. Հավատալ¸ որ Սերժ Սարգսյանի իշխանությունն ունակ է լուծել ղարաբաղյան հարցը¸ նշանակում է զբաղվել ինքնախաբեությամբ¸ քանի որ այն ունակ չէ անգամ գործազրկության հարցը լուծել: Այսպես՝ նախորդ տարվա հունվար-դեկտեմբեր ամիսներին պաշտոնապես գործազուրկ է եղել 79 հազար 166 հոգի։ Ցուցանիշ, որն ավելի է 2015թ. նույն ժամանակահատվածի համեմատ, երբ գործազուրկի կարգավիճակ էր ստացել 73 հազար 295 մարդ։