Собаке- собачья смерть, կամ՝ ինչու է 1in.am –ը վախեցած Նիկոլ Փաշինյանի հռետորաբանությունից

Ինչպես և սպասվում էր, Երևանի ավագանու ընտրությունների ընտրարշավի առաջին օրը «Իմ քայլը» հանրահավաքին կարևոր ելույթով հանդես եկավ Նիկոլ Փաշինյանը: Նա նշեց, որ այս ընտրությունները չափազանց կարևոր են իր համար, քանի որ այս ընտրության արդյունքով է նաև որոշվելու հեղափոխության հետագա ճակատագիրը, և եթե ժողովուրդը ուզում է, որ հեղափոխությունը շարունակվի, ապա «Իմ քայլը» պետք է ստանա ձայների 80 – 90 տոկոսը:

Հասկանալի է, որ դերասան Հայկ Մարությանի միջոցով նման ցուցանիշ դժվար է  արձանագրել: Այդ իսկ պատճառով Փաշինյանը օգտագործեց հեղափոխական ավանդական սև - սպիտակային տեխնոլոգիան: Բայց քանի որ ընտրարշավում իր նախկին դաշնակիցներն առանձին են գործում, ընդ որում, գործում են՝ օգտագործելով հեղափոխական հռետորաբանությունը, Փաշինյանը հիշեցրեց, որ ապրիլյան թավշյա հեղափոխությունից շաբաթներ առաջ իր այն ժամանակվա գործընկերները հետևողականորեն դեմ էին այդ հեղափոխությանը, չէին հավատում նրա հաղթանակին: Պարզ է, որ խոքը գնում է Էդմոն Մարուքյանի և Արամ Զավենի Սարգսյանի մասին: Եվ միայն հեղափոխության հաղթանակից հետո նրանք կանգնեցին Փաշինյանի կողքին: Իսկ այսօր էլ նրանք հայտ են ներկայացնում, որպես իբր երկրորդ հեղափոխական ուժ լինելու վերաբերյալ:

Փաշինյանը շատ լավ է հասկանում, որ իր նախկին գործընկերները, հավաքվելով «Լույս» դաշինքում, փաստորեն տրոհում են իր ընտրազանգվածը՝ դրանով իսկ մեծ հարված հասցնելով հենց անձամբ Փաշինյանին: Բացի այդ, նախկին հանրապետական մեքենան այսօր մեծամասամբ աջակցում է հենց այս նույն «Լույս» դաշինքին: Փաստորեն, առաջանում է շատ ծիծաղելի իրավիճակ: Հրապարակներում, դահլիճներում այս դաշինքը հանդես է գալիս հեղափոխական հռետորաբանությամբ, իսկ կուլիսներում՝ գաղտնի պայմանավորվում նախկին հակահեղափոխական ուժերի հետ: Հենց այս հանգամանքն էլ ստիպեց Փաշինյանին բաց ճակատով քննադատել իր նախկին գործընկերներին: Հենց այս հանգամանքն էլ դուր չելավ 1in.am կայքին, որն էլ իր խմբագրականում նշեց, որ Փաշինյանի այս հեղափոխական հռետորաբանությունը տանելու է ոչ թե հանդուրժողական մթնոլորտի հաստատման, այլ՝ հեղափոխական դիկտատուրայի:
Փաստորեն, երկար տարիներ Սերժ Սարգսյանի համար աշխատող 1in.am կայքը, որը թավշյա հեղափոխությունից հետո դարձավ Նիկոլ Փաշինյանից ավելի հեղափոխական /Հռոմի պապից ավելի կաթոլիկ/, որը պահանջում էր նախկին իշխանությունների հանդեպ յակուբինյան տեռոր իրականացնել, այսօր շոկի մեջ է հայտնվել Նիկոլ Փաշինյանի խոսքերից, որովհետև այդ խոսքերում հակահեղափոխական են դարձել ոչ միայն նախկին ուժերը, այլև՝ 1in.am կայքի ընկերները՝ «Լույս» դաշինքից:

Իսկ հիմա, որպեսզի բացատրենք այս շրջանակներին, թե ինչպես այդպես ստացվեց, ուզում ենք նրանց հիշեցնել հեղափոխության գլխավոր օրենքը՝ հեղափոխությունը ժամանակի ընթացքում սկսում է խժռել իր զավակներին:

Ռուսական հեղափոխության դասերը՝ Собаке- собачья смерть

Երբ 1917 թվականին Ռուսաստանում իրականացավ բոլշևիկյան հեղափոխություն, հանրությունը  բաժանեցին    ՞կարմիրների և սպիտակների՞: Սպիտակների դեմ արշավի և կարմիր տեռորի առավել հետևողական կողմնակիցներն էին բոլշևիկներ Կամենևը, Զինովևը, Տրոցկին և մյուսները: Երբ «սպիտակները» ֆիզիկապես վերացան, հեղափոխությունը չէր կարող կանգ առնել, այն պահանջում էր նոր հակահեղափոխական զոհեր, և  թիրախի  դերում   հայտնվեցին Կամենևը, Զինովևը, Բուխարինը:

Երբ «անցումային արդարադատության մարմինները» վճռում էին նրանց մահվան դատապարտելու որոշումները, հանրության մեծ մասը նրանց հետևից ասում էին՝ собаке- собачья смерть. Երբ Մեքսիկայում Տրոցկուն սպանեցին, նույն կարգախոսն էին գոչում, և ամենազավեշտալին այն էր, որ ստալինյան ռեպրեսիաների գլխավոր դատախազը Անդրեյ Վիշինսկին էր, այն նույն Վիշինսկին, ով 1917 թվականի ամռանը Լենինին ձերբակալելու արձանագրություն էր ստորագրել:

Ինչպիսի փիլիսոփայական և  պատմական  զուգադիպություն, երբ ներկայիս ՀՀ գլխավոր դատախազ Արտակ Դավթյանը, ով ապրիլին միջնորդություն էր ներկայացրել Նիկոլ Փաշինյանին անձեռնմխելիությունից զրկելու վերաբերյալ, վաղը կարող է հայկական Վիշինսկու դերակատարությունն ունենալ: Երբ հերթը հասնի 1in.am կայքի տերերին և նրանց ընկերներին, համոզված կարող ենք ասել, որ հանրության ճնշող մեծամասնությունը նրանց կարող է ցավոք սրտի ասել նույն բանը՝ собаке- собачья смерть, քանզի դա է բխում հեղախափոխական տրամաբանության ոսկե օրենքը:  Այնուամենայնիվ մեր կողմից ուզում ենք ընդգծել, որ մենք կտրականապես դեմ ենք նման հնարավոր զարգացումներին, քանզի Հայաստանն այդպիսի ռեսուրսներ չունի, և եթե իսկապես հայտնվի սև - սպիտակային հորձանուտի մեջ, ապա արդյունքում կկորցնի ոչ միայն Ղարաբաղը, այլև՝ սեփական պետականությունը: Եվ այդ իմաստով իսկապես պետք է վերհիշենք ապրիլյան թավշյա հեղափոխության գլխավոր կարգախոսը՝ սիրո և հանդուրժողականության մթնոլորտը:

Միգուցե այդ հանդուրժողականությունից մի քանի «շներ» ազատվեն պատասխանատվությունից, սակայն դա կլինի չարյաց փոքրագույնը, քանզի եթե մենք այդ «շների» պատճառով հեղափոխական՝ «ով մեր հետ չէ, մեր դեմ է» սկզբունքը կիրառենք առավել հետևողականությամբ, ապա երկիրն ակամայից կբերենք ցնցումների, որից կտուժեն բոլորը, քանզի իրական արևմտյան արժեհամակարգի համաձայն, /այդ արժեքների հետ որևէ կապ չունեն 1 in.am –ը և նրանց տերերը/, եթե 10 հոգուց հանցագործներ փնտրելուց կարող է պատժվել թեկուզև մեկ ազնիվ  անհատ, ապա ավելի լավ է ազատության մեջ մնան 9 հանցագործները, միայն թե  այդ մեկ ազնիվ անհատն անմեղ չպատժվի:

Այդ սկզբունքը միգուցե չի ընդունվի Հայաստանի հանրության մեծամասնության կողմից, բայց հենց այդ սկզբունքի հիման վրա են կայացել Միացյալ Նահանգները, Ֆրանսիան, Գերմանիան, Ճապոնիան և մնացած դեմոկրատական երկրները: Եվ չափազանց կարևոր է, որ Հայաստանում իսկապես ձևավորվեն իրական արևմտյան արժեքներ կրող շրջանակներ, որի հիման վրա հնարավոր կլինի կայացնել Հայաստանի ապագան՝ կյանքից դուրս շպրտելով գավառական ու գեղցի գրանտակերների, որոնք, սեփականաշնորհելով արևմտյան արժեքներն արտաքնապես, հետևողականորեն այն վարկաբեկում են մեր ժողովրդի աչքերում:

Դավիթ Մկրտչյան