Բռնաբարության փորձից մինչև ծննդկանի մահ. ի՞նչ է կատարվում «Կապանի ԲԿ»-ում

2016-ի դեկտեմբերի վերջին «Կապանի բժշկական կենտրոնում» 26-ամյա ծննդկանի և պտղի մահվան միջադեպից հետո լրատվամիջոցների և Կառավարության ուշադրությունն ուղղվել է դեպի այդ բժշկական կենտրոն:

Մասնավորապես, հունվարի 17-ին աշխատանքից հեռացվել է բժշկական կենտրոնի տնօրեն Սմբատ Օրբելյանը՝ տնօրենի կողմից իր պարտականությունները ոչ պատշաճ կատարելու հիմնավորմամբ:

Այն, որ այդ բուժհաստատությունում բազմաթիվ խնդիրներ կան, բազմիցս գրվել ու խոսվել է՝ սպասարկման որակից մինչև կադրային ոլորտ: Իսկ հունվարի 18-ին Սյունիքի մարզպետն անձամբ է ընդունել այդ կենտրոնի բուժանձնակազմին՝ հասկանալու համար նրանց խնդիրները: Մարզպետը նաև ներկայացրել է հանձնաժողովի կողմից բժշկական կենտրոնում հայտնաբերված խախտումները, անդրադարձել վերջին շրջանում «Կապանի բժշկական կենտրոնում» պարբերաբար տեղի ունեցող մահացության դեպքերին:

Ուշագրավն այն է, որ երեկ մամուլում լուրեր տարածվեցին, որը հաստատեց նաև ոստիկանությունը, որ վերը նշված բժշկական կենտրոնում բռնաբարության փորձ է իրականացվել: Մասնավորապես, ԲԿ-ի անեսթեզիոլոգը ոչ սթափ վիճակում փորձել է բռնաբարել հիվանդանոց դիմած 18 տարեկան աղջկա՝ պատճառելով ծանր մարմնական վնասվածքներ:

Փաստորեն, «Կապանի բժշկական կենտրոնում» խնդիրը ոչ միայն «վատ» տնօրենի կամ նրա վատ կառավարման մեջ է, այլև ընդհանուր մթնոլորտի:

Ծննդկանի և իր պտղի մահը, գրանցված մի շարք այլ մահացության դեպքերը, սպասարկման խայտառակ որակն ու բժշկի կողմից բռնաբարության փորձն արդեն վկայում են, որ այդ հաստատությունում միայն տնօրենի հեռացմամբ խնդիրների լուծման հասնել հնարավոր չէ: Պետք է նախևառաջ ազատվել «խնամի-ծանոթ-բարեկամ» արատավոր երևույթից, կադրային լուրջ փոփոխություններ սկսել և բարձրացնել սպասարկման որակը:

Կարծում ենք այս խնդիրը չի սկսվում և ավարտվում միայն «Կապանի բժշկական կենտրոնով»: Լուրջ ստուգումներ են պետք անցկացնել բոլոր մարզերում և բուժհաստատություններին պարտադրել բժշկական կենտրոնին վայել աշխատանք: Եթե Կառավարությունում համամիտ չեն մեզ հետ, կարող ենք խորհուրդ տալ սկսել Սևանից:

Հասմիկ Գրիգորյան