Արմեն Սարգսյան. «Իշխանությունը պետք է բալանսավորվի խորհրդարանի, կառավարության և նախագահի միջև» (Տեսանյութ)

ՀՀ նախագահ Արմեն Սարգսյանը «Россия 24» հեռուստաալիքի հետ հարցազրույցում խոսել է նոր երկրի նոր վարչապետի հետ աշխատանքի և ռուս-հայկական հարաբերությունների մասին:

Նրա խոսքով՝ Հայաստանի և Ռուսաստանի միջև հարաբերությունները կարող են ավելի խորը և ընդարձակ լինել ինչպես մշակութային, այնպես էլ տնտեսական տեսանկյունից:

«Ես մի քիչ դժգոհ եմ մեր հարաբերություններից, քանի որ իմ պատկերացմամբ մենք կարող էինք ավելի խորը և ընդարձակ հարաբերություններ ունենալ։ Ես գոհ չեմ, թե ինչպես ենք մենք այսօր ներկայանում Ռուսաստանում: Թեև մոտ 3 միլիոն հայ է ապրում Ռուսաստանում, գրեթե նույնքան, որքան Հայաստանում»,- ասել է Արմեն Սարգսյանը՝ ընդգելով, որ խոսքը կրթական և մշակութային ներկայության մասին է։ Ինչ վերաբերում է Եվրասիական տնտեսական միությանը անդամակցությանը, Սարգսյանի խոսքով, Հայաստանն ամբողջությամբ չի բացել իր բոլոր հնարավորությունները: Արմեն Սարգսյանը հարցազրույց է տվել նաեւ «Ամերիկայի ձայն»-ին եւ նշել է, որ Իշխանությունը պետք է բալանսավորվի խորհրդարանի, կառավարության և նախագահի միջև:

Նրա խոսքով, Հայաստանը փոփոխությունների կարիք ունի, որոնք կվերաբերեին Սահմանադրությանն ու մի շարք օրենքների. «Խնդիրն այն է, որ մենք չունենք հավասարակշռված Սահմանադրություն: Մեր Սահմանադրությամբ հսկայական լիազորություններ են տրված կառավարությանն ու վարչապետին: Հայաստանում դա կոչում են «սուպերվարչապետություն» եւ պարոն Փաշինյանը առաջիններից էր խորհրդարանում, որ որպես ընդդիմության առաջնորդ քննադատում էր այս ամենը:

Իրական իշխանությունը պետք է բալանսավորվի խորհրդարանի, կառավարության եւ նախագահի գրասենյակի միջեւ»:

Արմեն Սարգսյանը նշեց, որ այս փոփոխությունը հեշտությամբ չի արվելու, քանի որ Փաշինյանի գլխավորած կուսակցությունը ԱԺ-ում փոքրամասնություն է կազմում. «Սակայն այդ փոփոխությունները մեզ անհրաժեշտ են, քանի որ մեզ պետք չէ մի համակարգ, որը կայուն չի լինելու: Իրական իշխանությունը պետք է բաժանված լինի իշխանության երեք ճյուղերի միջեւ. առաջին հերթին խորհրդարանի, քանի որ սա խորհրդարանական հանրապետություն է, այնուհետեւ նախագահի գրասենյակի եւ վարչապետի գրասենյակի միջեւ: Դուք չեք կարող արտահերթ խորհրդարանական ընտրությունների գնալ, եթե հասարակության խոշոր մասը դժգոհ է ընտրական օրենսգրքից: Սա նույնպես պետք է փոփոխվի»:

Zham.am